Qazaqstanda bazalyq mólsherleme tómendegennen keıin jyljymaıtyn múlik naryǵy qalaı ózgeredi
ASTANA.KAZINFORM – Ulttyq banktiń Aqsha-kredıt saıasaty jónindegi komıteti bazalyq mólsherlemeni 0,25 paıyzdyq tarmaqqa tómendetip, 16,75%-ǵa deıin azaıtý týraly sheshim qabyldady.
Vedomstvo málimetinshe, eldegi jyldyq ınflıatsııa qatarynan toǵyzynshy aı tómendep keledi. Maýsym aıynda ınflıatsııa deńgeıi 10,3%-dy qurady. Bul mamyrdaǵy 10,4%-dan tómen.
Bul sheshimniń jyljymaıtyn múlik naryǵyna, ıpotekaǵa jáne ınvestıtsııalarǵa qalaı áser etetini týraly Kazinform agenttiginiń tilshisine jyljymaıtyn múlik jónindegi sarapshy Vıtalıı Shalaev aıtyp berdi.
Sarapshynyń aıtýynsha, bazalyq mólsherleme 17-18% deńgeıinde bolǵan kezde aqsha qymbat boldy. Óıtkeni, depozıtter joǵary tabys ákeldi, oblıgatsııalar tartymdy boldy, al bızneske arnalǵan nesıelerdiń quny joǵary deńgeıde qaldy. Sonyń saldarynan kóptegen ınvestorlar qarajatyn depozıtterde jáne konservatıvti qarjy quraldarynda saqtaýdy jón kórdi, al jyljymaıtyn múlikke suranys shekteýli boldy.
– Mólsherlemeniń 16,75%-ǵa deıin tómendeýi ázirge jaǵdaıdy túbegeıli ózgertpeıdi. Biraq bul ekonomıkadaǵy aqsha qunynyń birtindep tómendeı bastaǵanynyń alǵashqy belgisi, – dedi Vıtalıı Shalaev.
Onyń pikirinshe, Ulttyq banktiń bul sheshimi bıznes úshin oń belgi bolyp tabylady. Eger bazalyq mólsherlemeni tómendetý tsıkli jalǵasatyn bolsa, nesıeler birtindep arzandaıdy, bankter ekonomıkany belsendirek nesıeleı bastaıdy, al ınvestıtsııalyq belsendilik qaıta jandanady.
Sonymen qatar sarapshy qazirgi bazalyq mólsherlemeniń áli de joǵary ekenin atap ótti. Sondyqtan qoljetimdi nesıeler týraly aıtýǵa áli erte.
Jyljymaıtyn múlik naryǵyna toqtalǵan Vıtalıı Shalaev aldaǵy alty aıda aıtarlyqtaı ózgerister bolmaıdy dep esepteıdi. Ipotekalyq nesıeler áli de qymbat bolyp qala beredi, sondyqtan turǵyn úıge suranys pen baǵanyń kúrt ósýi kútilmeıdi. Degenmen naryqtaǵy ótimdilik azdap jaqsarýy múmkin.
Sarapshynyń aıtýynsha, eger aldaǵy 6-12 aı ishinde Ulttyq bank bazalyq mólsherlemeni tómendetýdi jalǵastyrsa, ıpoteka qoljetimdi bola bastaıdy, satyp alýshylar sany birtindep artady, al bastapqy turǵyn úı naryǵy toqyraý kezeńinen shyǵa alady. Dál sol kezde ınvestorlardyń turǵyn úıge degen qyzyǵýshylyǵy aıtarlyqtaı kúsheıýi múmkin.
Shalaev buǵan deıin bazalyq mólsherleme 17-18% bolǵan kezde ınvestorlarǵa qarajattaryn depozıtterge jáne tabysy joǵary basqa da qarjy quraldaryna ornalastyrýdy usynǵanyn aıtty. Alaıda qazir jaǵdaı birtindep ózgerip keledi.
– Eger mólsherlemeni tómendetý jalǵasa berse, ınvestorlar tabysy joǵary aktıvterdi izdeı bastaıdy. Olardyń qatarynda sapaly jyljymaıtyn múlik nysandary, tikeleı ınvestıtsııalar qorlary nemese depozıtterge qaraǵanda joǵary kiris ákeletin basqa da naqty aktıvter bolýy múmkin, – dep túsindirdi ol.
Sonymen birge sarapshy bazalyq mólsherlemeniń qazirgi tómendeýi avtomatty túrde jańa qurylys nemese ınvestıtsııalyq serpiliske ákeledi dep eseptemeıdi.
Onyń aıtýynsha, naryqqa áli de birqatar faktorlar keri áserin tıgizip otyr. Atap aıtqanda, nesıelerdiń joǵary quny, halyqtyń satyp alý qabiletiniń tómendeýi, turǵyn úı usynysynyń mol bolýy jáne ınflıatsııanyń saqtalýy. Budan bólek, kóptegen otbasylar úshin bastapqy jarnany jınaýǵa da ýaqyt qajet.
– Búginde ózgerip jatqan nárse jyljymaıtyn múlik naryǵynyń ózi emes, ınvestıtsııalyq sheshim qabyldaý logıkasy. Eger mólsherlemelerdiń tómendeýi jalǵasyp, ekonomıka turaqtylyǵyn saqtaıtyn bolsa, onda 2026-2027 jyldary kapıtal birtindep depozıtter men oblıgatsııalardan tabystylyǵy joǵary aktıvterge aýysa bastaıdy. Dál sol kezde jyljymaıtyn múlikke degen qyzyǵýshylyq qaıta artyp, balamaly ınvestıtsııalardyń tartymdylyǵy kúsheıedi, – dep qorytyndylady Vıtalıı Shalaev.
Buǵan deıin Ulttyq bank bazalyq mólsherlemeni 16,75% deńgeıinde belgilegenin jazǵanbyz.
