Qazaqstanda bazalyq mólsherleme 18% deńgeıinde qaldy
ASTANA. KAZINFORM — QR Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.
Bank taratqan aqparatqa sáıkes, bul sheshim boljam raýndynyń nátıjesine, negizgi makroekonomıkalyq kórsetkishterdiń jańartylǵan baǵalaýy men ınflıatsııa táýekelderiniń teńgerimine súıene otyryp qabyldandy.
Jyldyq ınflıatsııa 11,7%-ǵa deıin tómendedi
Jyldyq ınflıatsııa 2026 jylǵy aqpanda boljamdarǵa saı kelip, 11,7%-ǵa deıin tómendedi (qańtarda — 12,2%). Inflıatsııanyń barlyq komponenti qarqynnyń tómendep kele jatqanyn kórsetip otyr. Azyq-túlik taýarlary boıynsha baǵanyń ósýi 12,7% (12,9%), azyq-túlikke jatpaıtyn taýarlar boıynsha — 11,6% (11,7%), aqyly qyzmetter boıynsha — 10,8% (12%) boldy.
— Dezınflıatsııaǵa ustamdy qatań aqsha-kredıt sharttary, teńge baǵamynyń nyǵaıýy, kepilsiz tutynýshylyq kredıtteýdiń baıaýlaýy, ETRT-ni kezeń-kezeńimen arttyrý jáne teńestirý operatsııalary arqyly artyq ótimdilikti qysqartý, sondaı-aq Úkimet pen Ulttyq banktiń ınflıatsııaǵa qarsy birlesken keshendi sharalaryn iske asyrý yqpal etedi. Sonymen qatar ınflıatsııanyń tómendeýine TKQ jáne JJM baǵasyn kóterýge qoıylǵan moratorıı de úles qosady. QQS mólsherlemesin arttyrýdyń ınflıatsııa dınamıkasyna áseri shekteýli retinde baǵalanady. Degenmen, aılyq ınflıatsııa 2026 jylǵy aqpanda jedeldep, 1,1%-dy qurady. Bazalyq ınflıatsııa aqpanda 0,8% boldy. Halyqtyń aldaǵy bir jylǵa ınflıatsııalyq kútýleri tómendedi (aqpanda — 13,7%), biraq joǵary ári qubylmaly. Naryqqa kásibı qatysýshylardyń 2026 jylǵa ınflıatsııa boıynsha aqpandaǵy kútýleri 10,0%-ǵa deıin tómendedi (qańtarda — 10,8%), — delingen habarlamada.
Álemdik naryqtaǵy baǵa ózgeristeri
Azyq-túliktiń álemdik baǵasy baıaýlap keledi. Sút ónimderi men qant baǵasynyń tómendeýi saqtalyp otyr. Dándi daqyldar men ósimdik maıynyń álemdik baǵasy óskeni baıqaldy.
Reseı Federatsııasynda ınflıatsııa áli de joǵary, targetke jetý 2027 jyly kútiledi. EO-da baǵanyń ósýi turaqty túrde tómen bolyp qalyp otyr. AQSh-ta ınflıatsııa FRJ-nyń saralanǵan saıasaty jaǵdaıynda nysanaǵa jaqyndap keledi.
Munaı baǵasy 1 barrel úshin 60 AQSh dollaryna jýyq deńgeıge deıin birtindep tómendeıdi
Bazalyq stsenarıı aıasynda birinshi jartyjyldyqta Brent markaly munaıdyń baǵasy Taıaý Shyǵystaǵy qaqtyǵystyń órshýine baılanysty saqtalyp otyrǵan joǵary baǵalar aıasynda burynǵy alǵysharttardan ýaqytsha joǵary bolatyny boljanady. Budan keıin álemdegi suranys pen usynys teńgeriminiń nátıjesinde munaı baǵasy 1 barrel úshin 60 AQSh dollaryna jýyq deńgeıge deıin birtindep tómendeıdi dep boljanady. Boljamǵa sáıkes, 2026 jyly baǵa orta eseppen 1 barrel úshin 66,3 AQSh dollaryn qurap, keıingi jyldary 60 AQSh dollary deńgeıinde turaqtalady.
Neǵurlym joǵary munaı baǵasyn eskere otyryp, 2026 jylǵa ınflıatsııanyń boljamy naqtylandy. Baǵalardyń ósýi 9,5-11,5 sheginde baǵalanady. Degenmen, Ulttyq bank Úkimetpen birlesken is-qımyldardy iske asyrý, boljamdy fıskaldyq jáne kvazıfıskaldyq saıasatty qamtamasyz etý, TKQ men JJM-nyń ınflıatsııanyń ósýine qosatyn úlesin tómendetý arqasynda baǵanyń ósýi bir mándi deńgeıge jetedi dep kútedi. 2027 jyldyń qorytyndysy boıynsha ınflıatsııanyń 5,5-7,5%-ǵa deıin baıaýlaıdy dep boljanyp otyr. 2028 jyldyń qorytyndysy boıynsha ol 5%-dyq targetke jaqyn qalyptasady.
Proınflıatsııalyq táýekelder QQS mólsherlemesi ózgerýiniń baǵalarǵa birqalypty áseri aıasynda birshama tómendedi
Turaqty táýekelder retteletin baǵalardyń kóterilýinen bolatyn uzaqmerzimdi qaıtalama áserlerdi, sondaı-aq joǵary ınflıatsııalyq kútýlerdi qosa alǵanda, ishki faktorlarǵa shoǵyrlanady. Sonymen qatar 2027-2028 jyldary josparlanǵan bıýdjettik shoǵyrlandyrýdyń naqty oryndalýyna, sondaı-aq kvazıfıskaldyq yntalandyrýdyń aýqymy men parametrlerine nazar aýdarý qajet. Fakttiń Ulttyq qordan túsetin transfertterdi tómendetý jáne bıýdjet tapshylyǵyn qysqartý boıynsha belgilengen parametrlerden aýytqyǵan jaǵdaıynda, sondaı-aq kvazıfıskaldyq yntalandyrýlardy jetkilikti baqylanbaıtyn keńeıtý kezinde dezınflıatsııalyq áser álsireýi múmkin.
2026 jylǵa JІÓ-niń ósý boljamy 3,5-4,5% aralyǵynda saqtalǵan. 2025 jylǵy joǵary baza aıasynda ekonomıkalyq belsendilik 2026 jáne odan keıingi jyldary birqalypty traektorııada damıtyn bolady. Fıskaldyq shoǵyrlanýdyń jáne tutynýshylyq kredıtteý báseńdeýinen ishki suranys azaıatyn bolady.
2026 jyldyń ekinshi jartyjyldyǵynda bazalyq mólsherlemeni tómendetý múmkindigi qaralady
Ulttyq bank ınflıatsııanyń baıaýlaý qarqynyn, ishki suranys dınamıkasyn, fıskaldyq shoǵyrlandyrýdyń naqty oryndalýy jáne kvazıfıskaldyq yntalandyrýdy iske asyrý sapasyn baǵalaýdy jalǵastyrady. Sonymen qatar Úkimetpen birlesip, ınflıatsııany baqylaý boıynsha sharalardy iske asyrý tıimdiligine jáne TKQ men JJM baǵasynyń ózgerýine monıtorıng júrgiziledi. Inflıatsııanyń turaqty baıaýlaýy jáne jańa ınflıatsııalyq shoktardyń bolmaýy kezinde 2026 jyldyń ekinshi jartyjyldyǵynda bazalyq mólsherlemeni tómendetý múmkindigi qaralatyn bolady. Qazirgi jaǵdaıda aqsha-kredıt saıasatyn jeńildetý úshin keńistik áli qalyptasqan joq.
— Qabyldanǵan sheshimniń faktorlary men boljamdary týraly barynsha tolyq aqparat 2026 jylǵy 11 naýryzda Ulttyq banktiń resmı ınternet-resýrsynda ornalastyrylatyn Aqsha-kredıt saıasaty týraly baıandamada beriledi. QR Ulttyq bankiniń Aqsha-kredıt saıasaty komıtetiniń bazalyq mólsherleme boıynsha kezekti josparly sheshimi 2026 jylǵy 24 sáýirde Astana qalasynyń ýaqytymen saǵat 12:00–de jarııalanady, — delingen habarlamada.
Buǵan deıin Ulttyq bank aqpanda Ulttyq qordan 400 mln AQSh dollary kóleminde valıýta satylǵanyn habarlaǵan edi.