Qazaqstanda baılanys stansalaryn ornatý erejesi qaıta qaralady

NUR-SULTAN. QazAqparat – Radıofobııasy bar otandastarymyzdyń qamyn oılaı otyryp, elimizde bazalyq baılanys stansalaryn ornatý erejesin qaıta qaraý josparlanyp jatyr. Bul týraly QR Parlamenti Májilisiniń depýtaty Ekaterına Smyshlıaeva málim etti, dep habarlaıdy QazAqparat tilshisi.

«Bizdiń bastamamen qolǵa alynatyn jańa zań jobasy bazalyq baılanys stansalaryn ornatý erejelerine qatysty bolmaq. Bazalyq stansalardy ornatýǵa qatysty qoǵamda biryńǵaı pikir men naqty ustanym joq. Sondyqtan atalǵan normany qoǵam belsendilerimen talqylap, kópshilikke túsindiretin bolamyz. Bul jerde másele radıofobııasy bar azamattarǵa tikeleı qatysty bolyp tur. Baılanys qyzmetin bárimiz paıdalanamyz, sondyqtan máseleni artyq shý men daý-damaıǵa jetkizbeý kerek», - dedi Ekaterına Smyshlıaeva «AMANAT» partııasy alańynda ótken baspasóz máslıhatynda.

Halyq qalaýlysynyń málimdeýinshe, búginde radıofobııa - búkil álemde bar másele.

«Iá, radıofobııaǵa qatysty túrli pikirler bar. Onyń bazalyq baılanys stansasynan keletin zııan kóp deýshiler de tabylyp jatyr. Desek te stansadan keletin zııannan biz qoldanyp júrgen elektronıka quraldarynan keletin zııannyń birneshe ese artyq ekeni aıtylǵan ǵylymı dáleldeme bar», - deıdi ol.

Eske sala ketsek, QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın turǵyndardyń radıofobııasy baılanys sapasyn arttyrýǵa kedergi keltirip otyrǵanyn málimdegen edi.

Onyń aıtýynsha, bir-eki turǵynnyń shaǵymyna baılanysty mamandar úıdiń shatyryndaǵy bazalyq baılanys stansasyn alyp tastaýǵa májbúr.