Qazaqstanda baılanys qyzmeti naryǵynda básekelestiktiń damýyna ne kedergi

NUR-SULTAN. QazAqparat – Elimizde baılanys qyzmeti salasynda básekelestiktiń damýyn ne tejeıdi? Bul suraqqa QR Básekelestikti qorǵaý jáne damý agenttigi Kólik jáne baılanys departamentiniń dırektory Nurgúl Jamanova jaýap berdi, dep habarlaıdy QazAqparat tilshisi.

«Baılanys salasyna júrgizilgen taldaý kelesi máselelerdi kórsetip otyr. Birinshe kezekte, ádil básekelestiktiń joqtyǵy. Ekinshiden, baılanys qyzmetimen aınalysýǵa qatysty lıtsenzııa alýda ákimshilik kedergi bar. Sol sııaqty radıojelilik sektor boıynsha shekteý bar jáne oǵan ruqsat berý ashyq júrgizilmeıdi. Sonymen qatar kommýnaldyq-turmystyq sektorǵa qoljetimdiliktiń shekteýli bolýy da kedergi», - dedi Nurgúl Jamanova.

Sondaı-aq, departament basshysy elimizde baılanys salasyna jańa oıynshylardyń kirýine kederginiń baryn aıtty.

«Bul ásirese lıtsenzııa alý kezinde jańa oıynshylarǵa kedergi kóp. Osy oraıda monopolııamen kúresýshiler Tsıfrlyq damý, ınnovatsııalar jáne aeroǵarysh ónerkásibi mınıstrligine normatıvtik-quqyqtyq aktige ózgeris engizýdi surap otyr. Búginde mınıstrlik jobanyń jańa nusqasyn daıyndap, ony normatıvtik-quqyqtyq aktiler saıtyna jarııa etti. Sol aktiniń negizinde naryqtaǵy jańa qatysýshylar da óz qyzmetin usyna alady. Bul ádil básekeniniń ilgerileýine septigin tıgizedi», - deıdi ol.

Buǵan deıin habarlaǵanymyzdaı, elimizde mobıldi baılanys operatorlaryna 104 mln teńge aıyppul salyndy.

Aıta ketsek, búgin elordada otandyq telekommýnıkatsııa jáne tsıfrlandyrý salasynyń damý barysyna arnalǵan dóńgelek ústel ótti.