Elimizdegi báıge attarynyń baǵasy qansha
ASTANA. KAZINFORM – At baptap, ony báıgege qosatyndar Qazaqstannyń barlyq óńirinen, tipti shetelden sáıgúlik izdeıdi. Asyl tuqymdy attyń quny birneshe mıllıon teńge turady, dep habarlaıdy Kazinform tilshisi.
Asyl tuqymdy jylqylar
Báıgege qany taza asyl tuqymdy jylqylardy qosady. Jylqynyń bul túriniń mekeni - Anglııa. Áý basta aǵylshyn attary ataýy bolsa, álemge taraǵan soń ol da ózgerdi.
Sonymen birge báıge attary arasynda asyl tuqymdy Ahalteke jylqylary da bar. Arǵymaqtyń bul túri arab jáne qany taza attardan qalys qalmaıdy.
Qazaqstan ıppodromdarynan arab jylqysynda jıi kezdestirýge bolady.
Baǵasy ózgelerge qaraǵanda tómen bolatyn jylqynyń taǵy bir túri bar. Ol - aǵylshyn-arab tuqymy. Aty aıtyp turǵandaı, eki tuqymnyń qany aralasqan jylqy.
Qaıdan jáne qalaı tańdaýǵa bolady
Báıgege qosar sáıgúlikti tabý qıynnyń qıyny. Tańdaý kezinde birneshe ereksheligine nazar aýdarý kerek. Qaı tuqymnan ekeni mańyzdy. Eger erkegi nemese urǵashysy báıgede top jaryp júrgen bolsa, sáıkesinshe baǵasy da joǵary bolady.
Sonymen birge baǵa jylqynyń jasyna qaraı ózgerip turady. 3-4 jasar attar báıgege qosýǵa jaramdy dep esepteledi. Eger báıgege qosyp, júldegi oryndarǵa ıe bolsa, quny arta túsedi. Qazaqstandaǵy jarnama saıttarynda tek soǵymǵa jáne baǵýǵa arnalǵan jylqy, keıde úıir satylady. Al asyl tuqymdy attardy satatyn adamdar sanaýly ǵana. Sondyqtan báıgege at qosatyn adamdar shetelden, tipti muhıttiń arǵy jaǵynan sáıgilikti tańdap ákeledi.
Baǵasy qansha
Qazaqstannan shyqpaı-aq satyp alyp, báıgege at qosqyńyz kelse, 270-390 myń teńgeden bastaýǵa bolady. Aǵylshyn-arab jylqylarynyń eń arzanynyń quny osyndaı.
Reıtıng boıynsha ekinshi orynda arab jylqysy tur. Baǵasy orta eseppen 300 myń teńgeden bastalyp, 1 500 000 teńgege jetedi.
Al ahalteke tuqymdy jylqy baǵasy 550 myń teńgeden bastalady. Tipti báıgege qosyp, júlde alý úshin 2 mln 200 myń teńge tóleý qajet bolady. Biraq bul jylqylardyń baǵasy odan da qymbat bolýy múmkin.
Eń qymbaty - qany taza jylqy. Onyń baǵasy 250 myń teńgeden bastalǵanymen, qulynynyń quny báıgege qosýǵa jaramdy bolýyna baılanysty baǵalanady. Al asyl tuqymdy jylqyǵa 2,5 mln teńge tóleý qajet.
Eske salsaq, buǵan deıin usaq mal men iri qara baǵasy týraly jazyldy.
Sonymen birge Kazinform keıbir úı janýarynyń baǵasy týraly jazdy.