Qazaqstanda «Batyr arýlar - 2016» áskerı kásiptiń úzdik ókilderine daýys berý bastaldy (FOTO)

ASTANA. QazAqparat - Qazaqstanda «Batyr arýlar - 2016» áskerı kásiptiń úzdik ókilderine daýys berý bastaldy. Názik jandy jaýynger qyzdardyń 80 ókili biregeı baıqaýda jeńiske jetý úshin baq synasýǵa kiristi. Daýys berý kúninen bastap 3 kún ishinde 80 áıel áskerı qyzmetshige 32 myńǵa jýyq daýys berildi. Bul týraly QR Qorǵanys mınıstrliginiń baspasóz qyzmetinen habarlady.

Bul rette sandyq kórsetkish sekýnd saıyn ulǵaıýda.   Daýys berý 2016 jylǵy sáýirdiń 1-i men mamyrdyń 31-i aralyǵynda QR Qorǵanys mınıstrliginiń mod.gov.kz resmı veb-saıtynda ótedi.  Barynsha dáıekti daýys berý úshin árbir saıtqa kirýshi bir ir-adresten bir-aq daýys bere alady.   Tańdaý online rejimde ótedi, daýystar avtomatty túrde saıttyń  web-paraqshasynda kórsetiledi. Bul daýys berý barysy men árbir qatysýshy boıynsha daýys sanyn kórneki túrde qadaǵalap otyrýǵa múmkindik beredi. «Batyr arýlar» baıqaýy Qazaqstandaǵy áıelderdiń áskerı qyzmetin jarııa etý úshin Qazaqstan Respýblıkasy Qorǵanys mınıstrliginiń bastamasy boıynsha uıymdastyrylyp otyrǵanyn esterińizge sala keteıik. Byltyrǵy jyly tuńǵysh baıqaýǵa 123 áıel áskerı qyzmetshi qatysqan bolatyn. Qyryq kúndik onlaın daýys berý aıasynda konkýrsanttarǵa óte kóp, ıaǵnı, 255 725 daýys berildi. Baıqaý qazaqstandyqtardyń arasynda ǵana emes, ózge elderdiń turǵyndary arasynda da qyzyǵýshylyq týǵyzdy.

Daýys berýge Reseı, AQSh, Germanııa, Indonezııa jáne Úndistannyń paıdalanýshylary belsene atsalysty. Nátıjesinde talaı synaqtardan súrinbeı ótip, ózderiniń jaýyngerlik ázirlikterin, shydamdylyqtary men kúsh-jigerlerin dáleldegen 12 jeńimpaz anyqtalyp, Qazaqstan Qarýly Kúshteriniń laıyqty ókilderi ekendikterin moıyndatty. Dúbirli doda sońynda kásibı stılıster qyzdardy ajarlandyryp, jeńimpazdar mamandandyrylǵan kúntizbege arnalǵan fotosessııaǵa qatysty. Atalmysh kúnparaqtyń jeke-jeke betterin «Batyr arýlar» baıqaýynyń ár jeńimpazy árlendire tústi.