Qazaqstanda baspanalardyń kópshiligi nazardan tys qalyp otyr - Janat Jarasov
ASTANA. QazAqparat - Elimizde baspananyń edáýir kólemdegi úlesi nazardan tys qalyp otyr. Bul týraly búgin Senatta Qazaqstan Respýblıkasynda dinı ekstremızm men terrorızmge qarsy is-qımyl jónindegi 2013 - 2017 jyldarǵa arnalǵan memlekettik baǵdarlamany júzege asyrý máseleleri boıynsha depýtattar men múddeli memlekettik organdardyń kezdesýinde QR Parlamenti Májilisiniń depýtaty Janat Jarasov málim etti.
«Biz statıstıkany qarap shyqtyq. Búginde tek Astanada 15 myń jeke kásipker salyq organdarynda jalǵa berýshi retinde tirkelgen. Oılap qarańyzdarshy, osy rette úılerin jalǵa berip júrse de, tirkelmegen qanshama adam bar? Ózderińiz bilesizder, Astanada jalǵa beriletin úıler men páterlerdiń úlesi aıtarlyqtaı kóp. Endi, Azamattyq Kodekstiń 544 babyna sáıkes, jalǵa berýshi jalǵa alyp otyrǵan kez kelgen adammen aýyzsha shart jasasýǵa quqyly. Alaıda, jaqynda aýyzeki shartty bekitkenine baılanysty ol erteńgi kúni qanshalyqty esep beredi nemese bermeıdi? Osy rette nazardan tys qalyp otyrǵan aýqymdy kólemdegi baspana boıynsha suraq týyndaıdy»,-dedi J. Jarasov.
Depýtat óz sózinde Aqtóbede lańkester qylmysqa jaldamaly páterde daıyndalǵanyn, sondaı-aq teraktilerdi jasaǵannan keıin de jalǵa alynǵan páterlerde jasyrynǵanyn atap ótti.
Onyń paıymynsha, bul segmentti tártipke keltirý qajet bolyp tur. Ol óz sózinde damyǵan elderde jeke tulǵalardy tirkeýge turǵyzýdyń erejesi bar ekendigi jáne ol talaptar qatań saqtalatynyn jetkizdi.
Esterińizge sala keteıik, 2016 jyldyń 5 qazanynda QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Depýtat Janat Jarasov atalǵan zań jobasy boıynsha Májilistegi jumys tobynyń jetekshisi bolyp tabylady.
