Qazaqstanda baspana naryǵyndaǵy saýda-sattyq azaıdy
NUR-SULTAN. QazAqparat – Baspana naryǵynda múlikti satyp alý-satý mámileleriniń sany azaıdy. Bul týraly Birikken rıeltorlar qaýymdastyǵy prezıdentiniń keńesshisi Nına Lýkıanenko aıtyp otyr, dep habarlaıdy QazAqparat tilshisi.
«Sońǵy birneshe aıda, ıaǵnı 2022 jyldyń sáýirinen Biryńǵaı jınaqtaýshy zeınetaqy qorynda (BJZQ) jetkiliktilik sheginiń kólemi artqannan beri naryqtaǵy sharttardyń jalpy sany aıtarlyqtaı tómendedi», - dedi N. Lýkıanenko QazAqparat agenttigine bergen jaýabynda.
Onyń aıtýynsha, turǵyn úı naryǵyndaǵy jyljymaıtyn múliktiń barlyq segmentinde suranystyń azaıǵany baıqalyp otyr.
«Bir aıdaǵy kelisimsharttardyń jalpy sany 30-31myńǵa deıin qysqardy. Degenmen, bul kórsetkishti de jaqsy dep baǵalaýǵa bolady», - dedi sarapshy.
Eske salaıyq, bıylǵy 1 sáýirden bastap zeınetaqy qarajatynyń bir bóligin paıdalaný úshin eń tómengi jetkilikti shegi ósti. Jetkilikti shek adamnyń jas ereksheligi boıynsha ártúrli bekitilgen.
2021 jyldyń qańtarynan 2022 jyldyń 1 sáýirine deıin BJZQ salymshylardyń turǵyn úı jaǵdaıyn jaqsartý úshin zeınetaqy jınaǵyn paıdalanýǵa 1 317 739 ótinishin oryndady. Ýákiletti operator-bankterde ashylǵan qazaqstandyqtardyń arnaıy shotyna BJZQ 3,1 trln teńge aýdardy.
