Qazaqstanda baspana quny qymbattaı ma

ASTANA. QazAqparat - Qazaqstan Rıeltorlary birlesken qaýymdastyǵy prezıdentiniń keńesshisi Nına Lýkıanenko aldaǵy ýaqytta baspana qunynyń ósý múmkindigine qatysty pikir bildirdi, dep habarlaıdy QazAqparat tilshisi.

«Baspana baǵasy ósýi múmkin. Eger elimizdiń ekonomıkasyn, sondaı-aq basqa elderdiń ekonomıkasyn muqııat qarasaq, onda barlyǵynda ınflıatsııanyń joǵary qarqynyn baıqaýǵa bolady. Bul óz kezeginde valıýtanyń satyp alý qabiletiniń tómendeýin bildiredi. Eger elimizde jyljymaıtyn múlik baǵasynyń qalyptasýy týraly aıtatyn bolsaq, onda ımporttalatyn ınflıatsııa esebinen jańa turǵyn úıdiń sharshy metriniń quny qymbattaı túsedi», - dedi Nına Lýkıanenko QazAqparat agenttigine bergen jaýabynda.

Osy oraıda sarapshy baspana naryǵynda baǵanyń kúrt aýytqýy bolmaıtynyn, biraq ınflıatsııa protsesteri aıasynda baǵa ózgeretinin aıtty.

«Eger materıaldar satyp alynatyn elde ınflıatsııa 8-10 paıyzdy qurasa, biz osy materıaldarmen birge elge ınflıatsııanyń osyndaı deńgeıin jetkizemiz. Inflıatsııanyń bul deńgeıi teńgeniń qunsyzdanýyna qosymsha áser etedi. Baspana qunynyń kúrt aýytqýy bolmaýy múmkin, biraq ınflıatsııa úderisteri aıasynda baǵa ózgeredi», - dedi Nına Lýkıanenko.

Budan buryn habarlanǵandaı, sarapshy qazirgi kezde el boıynsha baspana naryǵynda aıyna 33-36 myń kelisimshart jasalyp otyrǵanyn aıtty.

Bul turǵyda ol taıaý aılarda turǵyn úı naryǵynda eleýli ózgerister bola qoımaıtynyn aıtty.