Qazaqstanda baspana baǵasy qalaı ózgerip jatyr
ASTANA. KAZINFORM – Elimizde bıylǵy maýsym aıynda turǵyn úı baǵasy ózgerip, bir aı ishinde jańa páterlerdiń, qaıtalama naryqtaǵy turǵyn úılerdiń jáne jalǵa beriletin baspananyń baǵasy ósti.
El boıynsha jańa turǵyn úıdiń bir sharshy metriniń ortasha baǵasy 617 555 teńge, al qaıtalama naryqtaǵy páterlerdiń ortasha quny 629 667 teńge. Abattandyrylǵan turǵyn úıdi jalǵa berýdiń ortasha baǵasy bir sharshy metr úshin 5 062 teńgege jetti.
Mamyr aıymen salystyrǵanda jańa turǵyn úı baǵasy 0,7%, qaıtalama naryqtaǵy páterlerdiń baǵasy 0,6%, al jaldaý aqysy 0,4% ósti. Jyldyq eseppen alǵanda jańa turǵyn úı baǵasy 14%, qaıtalama naryqtaǵy turǵyn úı 10,4%, al jaldaý aqysy 13,4% qymbattady.
Eń qymbat jańa turǵyn úı Astanada tirkeldi – bir sharshy metri 739 033 teńge, al Almatyda – 725 995 teńge. Qaıtalama turǵyn úı naryǵynda da kósh bastap turǵan qalalar – Almaty (749 592 teńge) jáne Astana (727 363 teńge).
Jaldaý aqysy boıynsha da eń joǵary kórsetkishter Almatyda bir sharshy metri 5 879 teńge jáne Astanada bir sharshy metri 5 646 teńge. Al Shymkentte turǵyn úıdi jalǵa alý quny bir sharshy metr úshin 4 288 teńge.
Eń arzan jańa turǵyn úı Oral qalasynda bir sharshy metri 327 013 teńge. Al turǵyn úıdi jalǵa alýdyń eń tómengi baǵasy Tarazda baıqaldy bir sharshy metr úshin 2 515 teńge.
Buǵan deıin Qazaqstanda 85 myńnan astam azamat baspanaly bolǵanyn jazǵanbyz.
Sonymen qatar Serik Jumanǵarın baspana qunynyń ósýine eshqandaı negiz joq ekenin aıtqan edi.
