Qazaqstanda baspa, ınternet jáne onlaın jýrnalıstıkaǵa arnalǵan arnaıy syılyq bekitiledi - Abaev

ASTANA. QazAqparat - «Tumar» birinshi ulttyq televızııalyq baıqaýynyń «Televızııalyq maýsymnyń eń úzdik oqıǵasy» atalymynda "Atameken Business Channel» telearnasy bas júldege ıe boldy. Baıqaý jeńimpazyna arnaıy músinsheni QR Aqparat jáne kommýnıkatsııalar mınıstri Dáýren Abaev tabystady, dep habarlaıdy QazAqparat.

«Qurmetti áriptester, qadirmendi qaýym! Eń aldymen kele jatqan Ulystyń  uly kúni - Naýryz meıramymen quttyqtaýǵa ruqsat etińizder.  Naýryz merekesi árqashan da jańarýdyń belgisi. Sondyqtan da búgingi berilip jatqan «Tumar» syılyǵy meniń oıymsha, bizdiń otandyq televızııaǵa jańa serpin, jańa úrdis, jańa qadam bolady», - dedi ol.

Sonymen qatar Dáýren Abaev búgingi saltanatty shara barysynda Aqparat jáne kommýnıkatsııalar mınıstrligine óte kóp jyly sózder aıtylǵanyn atap ótti.

«Mınıstr retinde, jeke maǵan osynaý syılyqty tabystaý úlken mártebe. Televızııalyq syılyqtyń óte jaqsy tájirıbesin eskere otyryp, kelesi jýrnalıstıka salasyndaǵy syılyq baspa, ınternet jáne onlaın basylymdar úshin bolmaq», - dedi Dáýren Abaev.