Qazaqstanda basqa eldermen salystyrǵanda jol qurylysynyń quny joǵary emes - Kamalıev

NUR-SULTAN. QazAqparat – Qazaqstanda basqa eldermen salystyrǵanda jol qurylysynyń quny joǵary emes. Bul týraly QR Indýstrııa jáne ınfraqurylymdyq damý vıtse-mınıstri Berik Kamalıev aıtty, dep habarlaıdy QazAqparat tilshisi.

«Basqa eldermen salystyrǵanda Qazaqstanda avtojol qurylysynyń joǵary qunyna qatysty suraqtar jıi qoıylyp jatady. Osy oraıda, bizdiń avtomobıl joldarynyń ortasha quny joldyń sanatyna, jol jabyndysynyń qurylymyna baılanysty 1 mln-nan 2,5 mln dollarǵa deıin jetetindigin atap ótkim keledi. Al kórshi elderde, Eýropa memleketterde ol 3 mln-nan 5 mln dollarǵa deıin jetedi», - dedi Berik Kamalıev Ortalyq kommýnıkatsııalar qyzmetindegi baspasóz máslıhaty barysynda.

Onyń atap ótýinshe, jobanyń quny joba-smetalyq qujattamanyń negizinde «Memsaraptama» RMK-nyń memlekettik saraptamasynan ótkennen keıin aıqyndalady. Al jumystardyń sapasy jumystardy qabyldaý jónindegi nusqaýlyqqa sáıkes tekseriledi.