Qazaqstanda barlyq turǵyndardyń 3 paıyzǵa jýyǵy múgedekter
ASTANA. 26 qyrkúıek. QazAqparat - Qazaqstandaǵy áleýmettik saıasattyń basym baǵyttarynyń biri múmkindigi shekteýli jandardyń ómir súrý sapasyn arttyrý, dep atap ótti búgin QR Eńbek jáne halyqty áleýmettik qorǵaý mınıstriniń orynbasary Svetlana Jaqypova.
«Bizde áleýmettik qorǵaýdyń úsh deńgeıli júıesi jasalǵan, memleket kepildendirgen arnaıy áleýmettik qyzmetterdiń tizimi belgilengen, múgedek azamattarǵa kórsetiletin qyzmetter men olardy ortaǵa beıimdeý quraldarymen qamtamasyz etý standarttary jasalyp, kezeń-kezeńimen iske asyrylyp kele jatyr. QR-nyń «QR múgedekterin áleýmettik qorǵaý týraly» zańyna sáıkes el Úkimeti janynan Úılestirý keńesi qurylyp, qyzmet atqaryp keledi», - dep atap ótti S. Jaqypova «Múgedekterdi Halyqaralyq qyzmet klassıfıkatsııalary (HQK) qararlaryn eskere otyryp ortaǵa beıimdeý jáne medıtsınalyq-áleýmettik saraptamanyń uıymdastyrýshylyq-quqyqtyq jáne ádistemelik negizderi» atty halyqaralyq konferentsııada. Onyń aıtýynsha, quramyna múddeli memorgandar men 16 múgedekterdiń qoǵamdyq birlestikteri jáne úkimettik emes uıymdar kiretin atalmysh Keńes konsýltatıvtik-keńes berýshi organ bolyp tabylady. «Múgedektik máselesiniń mańyzdylyǵy men múgedekterdi áleýmettik qorǵaýdy uıymdastyrý máseleleri atalǵan problemanyń aýqymdylyǵyna baılanysty. BUU sarapshylarynyń málimetinshe, álemdegi múgedekterdiń sany Jer sharyn mekendeıtin barlyq adamzat balasynyń 15 paıyzynan asyp túsedi. Al Qazaqstanda bul kórsetkish 3 paıyz shamasynda», - deıdi vıtse-mınıstr.
