Qazaqstanda barlyq memlekettik organdar men aımaqtar boıynsha bos jumys oryndarynyń biryńǵaı portaly qurylady

ASTANA. QazAqparat - Memlekettik qyzmet isteri jáne jemqorlyqqa qarsy kúres agenttiginde Qaırat Qojamjarovtyń tóraǵalyǵymen memlekettik qyzmetti jetildirý máseleleri boıynsha keńeıtilgen keńes ótkizildi.

Bul týraly QR Memlekettik qyzmet isteri jáne jemqorlyqqa qarsy kúres agenttiginiń baspasóz qyzmetinen habarlady.

Keńeske agenttiktiń qurylymdyq jáne aımaqtyq bólimsheleriniń basshylary qatysty. Otyrys barysynda memlekettik qyzmetti odan ári jetildirý, memlekettik qyzmetterdi kórsetý sapasyn qamtamasyz etý, tártiptik baqylaýdy iske asyrý qadamdary qarastyryldy.

Jıynda testileýdi jańǵyrtý, memlekettik qyzmetkerlerdi oqytý, olardyń qyzmette alǵa jyljýy máselelerine erekshe nazar aýdaryldy.

Talqylaý qorytyndylary boıynsha memlekettik qyzmetti damytý máselelerin sheshýge baılanysty jospar quryldy. Memlekettik qyzmetkerdiń kásibı jáne jeke qasıetteriniń profılin jasaý qyzmetkerlerdi basqarýdy jetildirý sharalarynyń biri bolmaq.

Josparda sondaı-aq baıqaý irikteýiniń ashyqtyǵyn arttyrý, testileýdiń shekti mánin esepteýdi qaıta qarastyrý, «B» korpýsynyń kadrlyq rezervin maqsatty toptar (jumys tájirıbesimen jáne tájirıbesiz) boıynsha qalyptastyrý boıynsha sharalar kórinis tapqan.

Memlekettik qyzmette jumys izdeýdi jeńildetý úshin úmitkerlerge arnalǵan barlyq memlekettik organdar men aımaqtar boıynsha bos jumys oryndarynyń biryńǵaı portaly qurylady.