Qazaqstanda barlyq kitaphanalarǵa biryńǵaı oqyrman bıletin engizý kózdelip otyr

ASTANA. QazAqparat - «Rýhanı jańǵyrý» jáne «100 jańa esim» jobalary jańa ıdeıalar men kreatıvti izdestirýge baǵyttap, halyqty yntalandyra túsedi. Bul jóninde jýrnalısterge QR Ulttyq akademııalyq kitaphanasy dırektorynyń mindetin atqarýshy Nurjan Joldybalınov málim etti.

«Biz qazir Qazaqstan boıynsha biryńǵaı oqyrman bıletterin jasaý úshin arnaıy jumystar atqarýdamyz. Oqyrman ár kitaphanaǵa ótinish jazyp, jańadan bılet alýdyń qajeti ne? Onyń ornyna búkil jerge bir bıletti tirkeýge bolady. Bul baǵytta sheteldik kitaphanalarmen yntymaqtastyq ornatýdy kózdeımiz», - dedi N. Joldybaldınov.

Onyń aıtýynsha, Qazaqstanda 107 myńnan astam kitap ataýlary jarııalanǵan.

«Dál qazir bul kitaptardyń barlyǵyn elektrondyq kitaphanaǵa engizýdi oılap otyrmyz. Sondaı-aq, oqýlyqtardy latyn grafıkasyna aýdarýdamyz. Sebebi keler urpaq latyn álipbıinde bilim alatyn bolady. Mysaly, Muhtar Áýezovtiń «Abaı joly» romanynyń tsıfrlyq nusqasyn alatyn bolsaq, ony kırıllıtsamen de, latyn tilinde de oqýǵa bolady. Kitapty birden latyn grafıkasyna aýdarýǵa bolady. Bul keleshek oqyrmandarymyz úshin óte yńǵaıly bolmaq», - dedi Nurjan Joldybalınov.

Sondaı-aq, ol oqýshylardyń mektepterde planshetti paıdalanýyna qatysty pikir bildirdi.

«Men balalardyń sabaq barysynda kitaptardyń ornyna planshet ustaǵandaryn qoldaımyn. Kishkentaı balanyń 10 kitaptyń ornyna bir ǵana planshetti alyp kelgeni áldeqaıda yńǵaıly. Onyń ústine olardyń qazir kózge esh zııany joq. Іshine júzdegen kitaptardy syıdyrýǵa bolady. Sabaqta nege paıdalanbasqa? Statıstıkaǵa sáıkes, keıbir elder qaǵaz oqýlyqtardy paıdalanǵandy unatady, al bizdiń jastar elektrondyq oqýlyqtardy qoldanǵandy jón kóredi», - dedi QR Ulttyq akademııalyq kitaphanasynyń dırektorynyń mindetin atqarýshy.

Aıta ketý kerek, Nurjan Joldybalınovtiń ózi «Qazaqstannyń 100 jańa esimi» jobasynyń jeńimpazdarynyń biri atanǵan edi.