Qazaqstanda barlyq azamattarǵa teń múmkinshilik prıntsıpi tabysty júzege asyrylǵan - M.Áshimbaev

ASTANA. QazAqparat - Qazaqstanda barlyq azamattarǵa teń múmkinshilik prıntsıpi tabysty júzege asyrylǵan. Bul pikirdi elordada ótip jatqan Qazaqstan halqy Assambleıasynyń «Beıbitshilik pen kelisim mádenıeti» atty ІІ halyqaralyq medıa forýmy jalpy sessııasynda QR Parlamenti Májilisiniń depýtaty Máýlen Áshimbaev bildirdi.

«Menińshe, Qazaqstandaǵydaı etnosaralyq balansty jáne qazirgi mýltıetnıkalyq qoǵamdaǵy beıbitshilikti qamtamasyz etýdiń basty sharttaryn bóle-jara kórsetýge bolady. Eń birinshiden, ulty men tiline qaramastan, barlyq azamattardyń teńdigi ustanymy men barlyq azamattarǵa teńdeı múmkinshilik berý eldiń zańdarynda naqty bekitilgen. Qazaqstanda bul ustanym tabysty júzege asyrylýda», - dedi M.Áshimbaev. Onyń atap ótýinshe, bul eń aldymen Ult kóshbasshysynyń eńbegi. Óıtkeni, elimizdiń Ata zańynda eshkim de ultyna jáne tiline baılanysty qandaı da bir kemsitýshilikke ushyramaıtyndyǵy naqty jazylǵan. «Buǵan qosa, kez kelgen azamat ana tili men mádenıetin paıdalanýǵa, sóılesý tilin óz erkimen tańdaýǵa, tálim-tárbıe, bilim alýyna quqy bar», - dedi ol.