Qazaqstanda barlyǵy 2457 ákim saılanatyn bolady - OSK
Bul týraly búgin Ortalyq saılaý komıssııasynda ótken brıfıng barysynda vedomstvonyń baspasóz hatshysy Venera Jeksembekova málim etti.
«Barlyǵy 2457 ákim saılanatyn bolady. Olardyń 47-si aýdandyq mańyzy bar qalalardyń ákimderi, 2101-i aýyldyq okrýg ákimderi, 119-y kentter ákimderi jáne 190-y aýyl ákimderi. Ákimdikke kandıdattardy usynýdy aýdannyń ákimi jergilikti qoǵamdastyqpen konsýltatsııalardan keıin balama negizde júzege asyratyn bolady», - deıdi V. Jeksembekova.
Onyń aıtýynsha, jergilikti qoǵamdastyqpen konsýltatsııalar aýdan ákimderiniń halyqpen jeke kezdesýi nysanynda ótedi. Osylaısha, aýdan ákimderiniń jergilikti halyqpen aýyldarda, kentterde jáne qalalarda tikeleı kezdesýi Prezıdent Jarlyǵynyń aýyl ákimderin saılaýdaǵy jurtshylyq pikiriniń eskerilýi jónindegi talabynyń oryndalýyn qamtamasyz etetin bolady.
