Qazaqstanda bankterdiń qarjylyq eseptiligine qoıylatyn talap kúsheıtildi
ASTANA. KAZINFORM – Qazaqstanda qarjy uıymdary men bankterdiń qarjylyq eseptiligin jarııalaý tártibi jańartyldy. Qarjy naryǵyn retteý jáne damytý agenttiginiń qaýlysymen qarjylyq eseptilik pen negizgi qyzmet kórsetkishterin jarııalaý qaǵıdalary bekitildi.
Qujatqa sáıkes, jekelegen holdıngtik qurylymdardy qospaǵanda, aktsıonerlik qoǵamdar men qarjy uıymdary jyl saıyn 31 tamyzǵa deıin halyqaralyq standarttarǵa saı ázirlengen jyldyq qarjylyq eseptilik pen aýdıtorlyq qorytyndyny jarııalap otyrýy tıis.
Eger uıymnyń enshiles kompanııalary bolsa, shoǵyrlandyrylǵan qarjylyq eseptilik jarııalanady. Al enshiles uıymdary joq mekemeler shoǵyrlandyrylmaǵan eseptilikti jarııalaıdy. Qarjylyq eseptilik buqaralyq aqparat quraldarynda nemese uıymdardyń resmı saıttarynda jarııalanady.
Al resmı saıty joq mıkroqarjy uıymdary eseptilikti salalyq qaýymdastyqtardyń saıttarynda jarııalaı alady. Sondaı-aq ekinshi deńgeıli bankter, saqtandyrý uıymdary jáne «Qazaqstannyń Damý Banki» AQ ár toqsan saıyn esepti kezeń aıaqtalǵannan keıin 60 kúntizbelik kún ishinde býhgalterlik balans pen kirister men shyǵystar týraly esepti jarııalap otyrýy tıis.
Qujatta bank jáne saqtandyrý holdıngterine, sondaı-aq sheteldik qarjy uıymdarynyń fılıaldaryna qatysty da jeke talaptar qarastyrylǵan. Atap aıtqanda, eseptilikti jarııalaý merzimi men qazaq jáne orys tilderinde usynylatyn mindetti qujattar tizimi naqtylandy.
Qaýly 2026 jylǵy 17 mamyrdan bastap kúshine enedi.
Buǵan deıin Qarjy naryǵyn retteý jáne damytý agenttigi qaryz júktemesin jeńildetýdiń zańdy joldary týraly túsinikteme bergen edi.
