Qazaqstanda bankterdiń aktıvteri bir aıda 1,53 trln teńgege ósken

NUR-SULTAN. QazAqparat – Qazaqstanda sheteldik úlespen 13 bank qyzmet etip jatyr. Bul týraly QR Qarjy naryǵyn retteý jáne damytý agenttiginen málim boldy, dep habarlaıdy QazAqparat tilshisi.

Agenttik málimetine qaraǵanda, 2022 jylǵy 1 shildedegi jaǵdaı boıynsha Qazaqstan Respýblıkasynyń bank sektorynda 22 ekinshi deńgeıdegi bank bar. Onyń ishinde 13-i sheteldik úlespen bolsa, sonyń arasynda 10-y enshiles bank.

2022 jylǵy maýsym aıynda bank sektorynyń jıyntyq aktıvteri 5,7 paıyzǵa artqan. Bul negizinen ótimdi aktıvterdiń 10,2 paıyzǵa nemese 1,53 trln teńgege ósýi esebinen boldy. 2022 jylǵy 1 shildedegi jaǵdaı boıynsha aktıvter 39,23 trln teńgeni qurady.

«Ekinshi deńgeıdegi bankterdiń 11,41 trln teńgeden astam nemese aktıvterdiń 29,1 paıyzyn quraıtyn ótimdiligi joǵary aktıvteriniń eleýli qory bar. Erkin ótimdiliktiń bolýy bankterge óz mindettemelerine tolyq kólemde qyzmet kórsetýge múmkindik beredi», - dep atalyp ótken habarlamada.

Bank sektorynyń mindettemeleri maýsym aıynda negizinen klıentter salymdarynyń 8,3 paıyzǵa ulǵaıýy esebinen 7,1 paıyzǵa ósti jáne 2022 jylǵy 1 shildedegi jaǵdaı boıynsha 34,7 trln teńgeni qurady.

Bank sektory mindettemeleriniń qurylymyna toqtalsaq, ol negizinen depozıt portfelin qamtyp otyr. Bul turǵyda bankterdiń jıyntyq mindettemeleriniń 76,2 paıyzyn nemese shamamen 26,44 trln teńgeni qurady.