Qazaqstanda bankterdi memlekettik qoldaýǵa shekteý engizilmek
ASTANA. KAZINFORM – Májilis tóraǵasynyń orynbasary Danııa Espaeva bankterge memlekettik qoldaý jasaýda shekteý engiziletinin aıtty.
- Bıýdjet qarajaty esebinen bankterge kómek kórsetý máselesi depýtattar men qoǵam tarapynan únemi synǵa alynyp keledi. Problemaly bankterdi retteýdiń qoldanystaǵy tetikteri memlekettiń qatysýyn shekteýdegi halyqaralyq tájirıbeni eskere otyryp jetildirýdi talap etedi, - dedi D. Espaeva Parlament Májisinde bank qyzmeti týraly zań jobasynyń tanystyrylymy kezinde.
Zań jobasyna sáıkes, bankter qarjylyq jaǵdaıyn derbes qalpyna keltiredi. Bankterdiń tólem qabiletsizdigin sheshý máselesinde memlekettiń qatysýyna shekteý engizildi.
- Bul óz kezeginde bıýdjet qarajatyn paıdalanýdy shekteıdi, sondaı-aq memlekettik qoldaýǵa súıenbeı, basqarýdy jaqsartý jáne banktiń turaqtylyǵyn qalpyna keltirý úshin yntalandyrý jasaıdy, - dedi depýtat.
Memlekettik qoldaý tek júıelik mańyzy bar bankke ǵana kórsetiledi. Ony Qarjy naryǵyn retteý jáne damytý agenttigi men Ulttyq bank anyqtaıdy.
Sonymen qatar, memlekettik qoldaý boıynsha mindettemeler tolyq ótelgenge deıin, aktsıonerler men basshylarǵa dıvıdendter men aqshalaı ótemaqy tóleýge tyıym salynady.
Eske salsaq, bıylǵy Joldaýda Memleket basshysy Qasym-Jomart Toqaev bankter týraly zańdy 2025 jyldyń aıaǵyna deıin qabyldaý kerek ekenin atap ótti.