Qazaqstanda bankrottyq jáne ońaltý satysynda qansha kásiporyn tur
Búgin Parlament Senatynyń jalpy otyrpysynda «Qazaqstan Respýblıkasynyń keıbir zańnamalyq aktilerine ońaltý jáne bankrottyq rásimderin, bıýdjettik, salyq zańnamasyn jáne temirjol kóligi týraly zańnamany jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaralyp jatyr.
«Búgingi tańda bankrottyq rásiminen 4 myńǵa jýyq bıznes sýbektisi ótip jatyr, 400 kásiporyn ońaltý satysynda. Іs júzinde, kúrdeli qarjylyq jaǵdaıdaǵy bıznes sýbektileri aıtarlyqtaı kóp. Qoldanystaǵy zań kásipkerge sátsiz bıznesti tez jabýǵa múmkindik bermeıdi. Árbir tórtinshi jaǵdaıda sot bankrot dep tanýdan bas tartady. Sotqa sýbektiniń qarjylyq jaǵdaıyna obektıvti baǵa berý qıyn. Sot bolar-bolmas aktıvtiń bolýyn qaryzdar boıynsha esep aıyrysý múmkindigi retinde baǵalaıdy», - dedi Úkimet basshysynyń birinshi orynbasary.
Osy oraıda ol mundaı jaǵdaı ońaltý aıasynda da baıqalyp otyrǵandyǵyn jetkizdi.
«Boryshkerdiń tólem qabileti bar nemese tólem qabilettiligin qalpyna keltirý úshin resýrstardyń bar ekenin dáleldeı almady degen sebeppen sot kóp jaǵdaıda ońaltý rásimin qoldanýdan bas tartady. Osyǵan baılanysty, zań jobasy ońaltý jáne bankrottyq rásimderin qoldaný úshin jaǵdaılardy jeńildetýge, sondaı-aq rásimderdi júrgizý merzimderin qysqartýǵa jáne áreketsiz boryshkerlerdi jabýdy jeńildetýge baǵyttalǵan», - dedi Á. Smaıylov.
Eske sala keteıik, bıyl mamyr aıynda QR Prezıdenti Qasym-Jomart Toqaev Qazaqstanda kásiporyndar men kompanııalardy saýyqtyrý men bankrottyǵy talaptaryn túbegeıli jeńildetý jáne rásimder merzimin qysqartý kerektigin tapsyrǵan bolatyn.
