Qazaqstanda bankrottyq rásimderdi ótkizý jeńildeıdi
Búgin Májiliste «Qazaqstan Respýblıkasynyń keıbir zańnamalyq aktilerine ońaltý jáne bankrottyq rásimderin jetildirý máseleleri boıynsha ózgerister men tolyqtyrýlar engizý týraly» zań jobasy tanystyryldy.
«Elbasy ótken jylǵy qyrkúıekte Parlamenttiń altynshy shaqyrylymynyń úshinshi sessııasynyń ashylýynda ońaltý jáne bankrottyq rásimderdi jetildirý qajettiligi týraly atap ótken bolatyn. Tapsyrmany júzege asyrý maqsatynda mınıstrlik tarapynan zań jobasy ázirlendi. Búginde 400-ge jýyq kásiporyn ońaltý rásimin, 4 myńǵa tarta bıznes sýbektileri bankrottyq rásimin qoldanýda. Negizinde, qarjylyq jaǵdaıy aýyr bıznes sýbektileriniń sany aıtarlyqtaı kóp», - dep toqtaldy Q. Baedilov.
Onyń sózine qaraǵanda, qoldanystaǵy zań kásipkerge tez arada sátsiz bıznesin jabýǵa jol bermeıdi, sondaı-aq búginde áleýeti barlarǵa ońaltý protsesine júginýge qıyn bolyp otyr.
«Árbir tórtinshi jaǵdaıda sot boryshkerdi bankrot dep tanýdan bas tartady. Sotqa sýbektiniń qarjylyq jaǵdaıyna obektıvti baǵa berý qıyn. Kishkentaı aktıvterdiń bar bolýy sot úshin qaryzdardy óteýge múmkindik bar dep eseptelinedi. Osyndaı jaǵdaı ońaltýdy qoldanýda da baıqalyp otyr», - dedi vıtse-mınıstr.
Atalǵan zań jobasynda bankrottyq rásimderdi ótkizý merzimin qysqartý eskerilgen. Bul rette kredıtorlar jınalysynyń birqatar ókilettikterin mobıldi kredıtorlar komıtetine berý, basqarýshylardyń banktik qupııany quraıtyn málimetti alý tártibin jeńildetý, ádeıi jáne jalǵan bankrottyq úshin jaýaptylyqqa tartý tártibin ózgertý qarastyrylǵan.
