Qazaqstanda bank júıesindegi depozıtter jyl basynan beri 32,5 paıyzǵa ósti - QR Ulttyq banki
ALMATY. QazAqparat - Qazaqstanda 2015 jyldyń basynan qarasha aıynyń sońyna deıin bank júıesindegi depozıtterdiń jalpy kólemi 32,5 paıyzǵa ósti. Bul týraly búgin Almatyda ótken baspasóz máslıhaty barysynda QR Ulttyq bankiniń tóraǵasy Danııar Aqyshev málim etti.
«2015 jylǵy qarashada jalpy aqsha massasy 5,8 paıyzǵa, ıaǵnı 16684,4 mlrd. teńgege deıin (jyldyń basynan beri 30,2 paıyzǵa ulǵaıdy) ulǵaıyp, aınalystaǵy qolma-qol aqsha kerisinshe, 0,9%-ǵa - 1190,2 mlrd. teńgege deıin qysqardy. Al bank júıesindegi depozıtter 6,3%-ǵa, ıaǵnı 15494,2 mlrd. teńgege deıin ósti. Jyl basynan bergi ósim - 32,5 paıyzdy qurap otyr», - dedi D. Aqyshev.
Sonymen qatar, bas bankır ústimizdegi jyldyń qarasha aıynda
Ulttyq banktiń jalpy halyqaralyq rezervteri 0,4%-ǵa, ıaǵnı 28,6 mlrd. AQSh dollaryna deıin ulǵaıǵandyǵyn jetkizdi.
«Ulttyq Banktiń taza halyqaralyq rezervteri qarasha aıynda 0,5%-ǵa, ıaǵnı 27,8 mlrd. AQSh dollaryna deıin ulǵaıdy (jalpy, jyldyń basynan beri 1,7%-ǵa tómendedi) ulǵaıdy. 2015 jylǵy qarashada taza valıýtalyq qorlar 3,5 paıyzǵa ósip, altyndaǵy aktıvter 7,0 paıyzǵa tómendedi. Altyn-valıýta qorynyń deńgeıine halyqaralyq naryqta altyn baǵasynyń ózgerýi áser etedi. Bizde rezervter AQSh dollarymen esepteledi ǵoı. Degenmen, bizde eýronyń da portfeli bar. Sondyqtan, altyn-valıýta qorynyń deńgeıi Ulttyq banktiń ishki valıýta naryǵyna qatysý deńgeıin dál kórsete almaıdy. Muny Ulttyq banktiń valıýtalyq óktemdilik operatsııalary arqyly kórsetýge bolady. Sonymen, 2014 jyly óktemdilik deńgeıi 22 mlrd. AQSh dollaryn qurasa, 2015 jyldyń sońǵy 10 aıy ishinde bul kórsetkish 17,4 mlrd. AQSh dollaryn qurady. Munyń barlyǵy eldiń altyn-valıýta qoryn saqtaý jáne ishki valıýta naryǵynda alypsatarlyq áreketterdi boldyrmaý úshin jasalady», - dedi D. Aqyshev.
