Qazaqstanda bank sektory tehnologııalyq turǵyda jetkilikti damymaǵan - Ulttyq bank tóraǵasy
ALMATY. QazAqparat - Qazaqstanda bank sektory tehnologııalyq turǵyda jetkilikti damymaǵan. Bul týraly búgin jýrnalısterge bergen suhbatynda QR Ulttyq bankiniń tóraǵasy Qaırat Kelimbetov málimdedi.
Onyń aıtýynsha, Qazaqstannyń bank sektory qazirgi tańda zaman talaptaryna tolyq jaýap bere almaıdy.
«Qazaqstannyń bank sektory 90-jyldary jáne 2000 jyldary quryldy ǵoı. Eýropanyń jáne AQSh-tyń sol kezdegi kóptegen qarjy ınstıtýttarynyń damý joldarymen júrip otyrdy. Al búginde jańa tásil qajet. Qazir álemde qarjylyq qyzmet kórsetý salasynda ǵalamat ózgerister bolyp jatyr! Qazir kez kelgen azamat óziniń banktegi esepshotyn kóre alady, aqshasyn qalaı jumsaýdy biledi. Tipti, osy júıe boıynsha bir adam ekinshi adamǵa nesıe usyna alady. Sondyqtan qazir biz bank sektoryn jańartý máselesimen tyǵyz aınalysyp jatyrmyz. Bul jerde halyqaralyq keńesshilerdi shaqyratyn bolamyz. 2020 jyldan keıin bankter qarjylyq qyzmet kórsetýde jańa deńgeıge kóteriledi», - dedi óz sózinde Q. Kelimbetov.
Sonymen qatar, elimizdiń bas bankıri elektrondy aqshanyń bolashaǵy zor ekendigin aıta kele, ázirge oǵan qatysty sheshilmegen máselelerdiń kóp ekendigin jetkizdi.
«Qazir bul másele búkil álem boıynsha talqylanyp jatyr. Ázirge elektrondy aqshamen qaı ınstıtýttyń aınalysatyny túsiniksiz. Bankter me álde uıaly operatorlar ma, bolmasa «Feısbýk» «Amazon» «Alı baba» sekildi jeke kompanııalar ma? Olar bul salada tájirıbelik jumystaryn bastap ta jibergen. Biraq eń basty másele sheshilgen joq. Ol - aqshanyń qaýipsizdigi, saqtalýy. Bul másele sheshilmeı jáne elektrondy aqshanyń aınalymy rettelmeı biz qandaı da bir naqty sheshimge kele almaımyz», - dedi Q. Kelimbetov.
