Qazaqstanda balyqtardyń jańa túrleri ósirile bastady
NUR-SULTAN. QazAqparat – Ósirilgen balyq kólemi 2030 jylǵa qaraı jylyna 270 myń tonnaǵa deıin ulǵaıtylady. Bul týraly QR Ekologııa, geologııa jáne tabıǵı resýrstar mınıstrliginiń vıtse-mınıstri Ahmetjan Pirimqulov málim etti, dep habarlaıdy QazAqparat tilshisi.
«Baǵdarlamada ósirilgen balyq kólemin 2030 jylǵa qaraı jylyna 270 myń tonnaǵa deıin ulǵaıtý mindeti qoıylǵan. Ol úshin 1 myńnan astam jańa balyq ósirý sharýashylyqtary qurylatyn bolady. Jedel aqparat boıynsha, jyl basynan beri balyq ósirýshiler shamamen 12 myń tonna taýarlyq balyq ósirgen, jospar boıynsha 12,8 myń tonna. Jyl sońyna deıin bul kórsetkish tolyq kólemde oryndalatyn bolady», - dedi Ahmetjan Pirimqulov Úkimet otyrysynda.
Onyń aıtýynsha, sonymen birge balyq aýlaý kólemi ótken jylmen salystyrǵanda 3%-ǵa ósti.
«Balyq sharýashylyǵy salasyndaǵy bıznes úshin zańnamalyq deńgeıde qolaıly jaǵdaılar jasalýda. Eń mańyzdysy, qoldanystaǵy memlekettik qoldaý sharalaryn keńeıtý, balyq ósirý sharýashylyqtaryna olardyń qurylysy men jumys isteýi kezinde artyq talaptardy alyp tastaý bolyp otyr. Sonyń arqasynda aǵymdaǵy jyly agroónerkásip kesheninde balyq óndirý boıynsha 9 ınvestıtsııalyq joba iske asyryldy. 280 jumys ornyn qurýmen jáne 3,2 mlrd teńge jeke ınvestıtsııalardy tartýmen olardyń jalpy qýattylyǵy shamamen 10 myń tonnany quraıdy», - dedi vıtse-mınıstr.
Atalǵan balyq ósirý sharýashylyqtarynyń birqatary forel, tılapııa, afrıkalyq jaıyn sııaqty balyqtardyń jańa túrlerin ósiredi: Olar Qazaqstan úshin dástúrli emes, biraq qysqa merzimde taýar massasyn alý esebinen kommertsııalyq jaǵynan tartymdy bolyp sanalady. Eń iri jobalar Túrkistan, Aqtóbe jáne Shyǵys Qazaqstan oblystarynda júzege asyryldy.
Balyq ósirý jobalarymen birge Qyzylorda oblysynda ornalasqan eki balyq óńdeý jobasy iske asyryldy.
