Qazaqstanda balyq ósirýde qandaı iri jobalar iske qosylady

NUR-SULTAN. QazAqparat – Bıyl balyq ósirý kólemi 129 myń tonna bolatyn 32 jobany iske asyrý bastaldy. Bul týraly QR Ekologııa, geologııa jáne tabıǵı resýrstar mınıstrliginiń vıtse-mınıstri Ahmetjan Pirimqulov málim etti, dep habarlaıdy QazAqparat tilshisi.

«Indýstrııalyq balyq ósirý ınvestıtsııalyq jobalarymen qatar, tabıǵı sý qoımalaryn paıdalana otyryp, jobalardy iske asyrý boıynsha sharalar qabyldap jatyrmyz. Bıyl jańa 113 kólde balyq ósirý jáne tor sharýashylyqtary quryldy», - dedi A.Pirimqulov.

Onyń aıtýynsha, olardyń esebinen shamamen 5,8 mlrd teńge jeke ınvestıtsııalar tartylyp, bir myńǵa deıin jumys oryndaryn qura otyryp, jylyna 10 myń tonnaǵa deıin balyq ósiriledi dep josparlanyp otyr.

«Budan basqa, bıyl balyq ósirý kólemi 129 myń tonna bolatyn 32 jobany iske asyrý bastaldy. Olardyń aıaqtalý merzimi 2022 jyldan 2025 jylǵa deıin. Shamamen 182 mlrd teńge ınvestıtsııa tartý kózdelip otyr», - dedi vıtse-mınıstr.

Osy oraıda ol eń iri jobalar týraly baıandap berdi.

«Akvafaktorııa» JShS Aqmola oblysynda bekire ósirý jobasy boıynsha memlekettik saraptamanyń oń qorytyndysy alyndy. Qaryzdy saqtandyrý máselesi sheshilýde. Bul qurylysty bastaý úshin 2,7 mlrdteńge kóleminde qaryz qarajatyn paıdalanýǵa múmkindik beredi.

Qaraǵandy oblysynda «Saryarqa» arnaıy ekonomıkalyq aýmaǵynda qýaty táýligine 300 tonnaǵa deıin balyq azyǵyn óndiretin zaýyt salý jobasy boıynsha búginde jerdegi qurylys jumystary júrgizilip jatyr. Sondaı-aq, jyl sońyna deıin Ázerbaıjan, Germanııa jáne Izraıl mamandaryn tarta otyryp, jobalaý aıaqtalady. Investıtsııa kólemi - 30 mlrdteńge.

«5 joba boıynsha Almaty, Jambyl, Qostanaı jáne Mańǵystaý oblystarynda qurylys-montajdaý jumystary júrgizilýde. Almaty oblysynda 2 joba boıynsha sý aıdyndary bekitilgen», - dedi A.Pirimqulov.