Qazaqstanda balmuzdaq óndirisi 47,4% ósti
ASTANA. KAZINFORM — 2026 jyldyń birinshi jartyjyldyǵynyń qorytyndysy boıynsha elimizdiń balmuzdaq óndirisi turaqty ósim kórsetti. QR Strategııalyq josparlaý jáne reformalar agenttigi Ulttyq statıstıka bıýrosy men salalyq sarapshylardyń dereginshe, óndiris kólemi 35,1 myń tonnaǵa jetip, byltyrǵy osy kezeńmen salystyrǵanda 47,4% artty.
Aýyl sharýashylyǵy mınıstrliginiń habarlaýynsha, osy kezeńde ishki naryqtyń syıymdylyǵy 41,2% ósip, 31,9 myń tonna boldy. Al ımport kólemi nebári 7,1% ósip, 5,1 myń tonnaǵa jetti. Bul otandyq óndirýshilerdiń naryqtaǵy úlesiniń nyǵaıyp kele jatqanyn, sheteldik ónimderge táýeldiliktiń azaıǵanyn jáne ımportty almastyrý úderisiniń jalǵasyp jatqanyn kórsetedi.
— Óndiris kóleminiń ósýi eksport kórsetkishterine de tikeleı áser etti. 2026 jylǵy qańtar-mamyr aralyǵynda Qazaqstan 8 343 tonna balmuzdaq eksporttap, byltyrǵy osy kezeńmen salystyrǵanda 38,5% joǵary nátıje kórsetti. Osy ýaqytta ımport kólemi 5 145 tonna bolyp, nebári 7,1% ǵana ósti. Osylaısha, eksporttyń ósý qarqyny ımporttan edáýir joǵary bolyp qalyp otyr, al Qazaqstan balmuzdaqtyń netto-eksporttaýshysy retindegi mártebesin senimdi túrde nyǵaıtyp jatyr, — delingen habarlamada.
Qazaqstandyq balmuzdaqtyń negizgi eksporttyq naryǵy — burynǵysynsha Reseı. Bul elge 5 748 tonna ónim jóneltildi, bul jalpy eksport kóleminiń shamamen 69%-y jáne byltyrǵymen salystyrǵanda 39,6% artyq.
Ekinshi iri baǵyt — Qyrǵyzstan. Bul elge 2019 tonna ónim eksporttalyp, 46,7%-dyq ósim tirkeldi. Bul negizgi eksporttyq naryqtar arasyndaǵy eń joǵary kórsetkish boldy.
Ózbekstanǵa 498 tonna balmuzdaq eksporttaldy. Sonymen qatar Tájikstanǵa 53 tonna, Mońǵolııaǵa 17 tonna jáne Ázerbaıjanǵa 8 tonna ónim jetkizildi. Sonymen birge Qytaı naryǵyndaǵy qatysýdy keńeıtý jumystary jalǵasyp, qazirgi tańda jetkizilim kólemin ulǵaıtý úshin qajetti retteýshilik jáne logıstıkalyq máseleler sheshilip jatyr.
Eksporttyń qarqyndy ósýine qaramastan, ımport qurylymy salystyrmaly túrde turaqty bolyp otyr. Qazaqstanǵa balmuzdaq jetkizetin negizgi elder — Reseı 2 250 tonna jáne Qyrǵyzstan 2 073 tonna, olardyń úlesine jalpy ımport kóleminiń 84%-dan astamy tıesili. Sonymen birge Belarýsten jetkizilim 118%-ǵa, al Ózbekstannan 78,9%-ǵa ósti.
Alaıda jekelegen elderden ımport kóleminiń ulǵaıýyna qaramastan, jalpy ımport ósimi otandyq óndiris qarqynynan aıtarlyqtaı tómen bolyp qalyp otyr.
Eske salaıyq, buǵan deıin elde 35 myń tonnadan astam balmuzdaq óndirilgenin habarlaǵanbyz.
