Elimizde balyq sharýashylyǵyn memlekettik qoldaýdyń keshendi sharalary iske qosyldy

ASTANA. KAZINFORM - «Akvasharýashylyq týraly» zańdy iske asyrý aıasynda balyq óndirýshilerdiń shyǵyndaryn azaıtýǵa, ınvestıtsııa tartýǵa jáne salanyń turaqtylyǵyn arttyrýǵa baǵyttalǵan memlekettik qoldaýdyń jańa keshendi sharalary qalyptastyryldy.

QR Aýyl sharýashylyǵy mınıstrligi baspasóz qyzmetiniń habarlaýynsha, búginde akvasharýashylyq sýbektilerin memlekettik qoldaý sýbsıdııalaýdyń úsh negizgi baǵytyn qamtıdy.

• Birinshi baǵyt - akvasharýashylyq salasyndaǵy ınvestıtsııalyq salymdar kezinde jumsalǵan shyǵyndardyń bir bóligin óteý.
• Ekinshi baǵyt - óniminiń sapasyn arttyrýdy, sondaı-aq asyl tuqymdy balyq ósirýdi damytýǵa arnalǵan sýbsıdııalar.
• Úshinshi baǵyt - sý berý qyzmetteriniń qunyn sýbsıdııalaý.

Negizgi jańashyldyqtardyń biri - ınvestıtsııalyq salymdardy sýbsıdııalaý qaǵıdalarynyń jańartylýy boldy. Alǵash ret qarsy mindetteme engizildi: sýbsıdııa alýshylar memlekettik qoldaýdy alǵannan keıin keminde bes jyl boıy akvasharýashylyq salasyndaǵy qyzmetin jalǵastyrýǵa mindetti. Bul sheshim bıýdjet qarajatynyń uzaqmerzimdi tıimdiligin qamtamasyz etýge jáne qoldaý sharalaryn formaldy paıdalanýdyń aldyn alýǵa baǵyttalǵan.

Qoldanystaǵy qaǵıdalarǵa sáıkes, ınvestıtsııalyq shyǵyndardyń ótemaqysy birqatar basym baǵyt boıynsha 25% mólsherinde júzege asyrylady. Olardyń qatarynda qýaty saǵatyna keminde bir tonna bolatyn akvasharýashylyq nysandaryna arnalǵan jem óndiretin zaýyttar men tsehtardy qurý jáne keńeıtý, jylyna 25 tonnadan bastap ónim óndiretin toǵan sharýashylyqtaryn damytý, sondaı-aq dál osyndaı qýattaǵy basseınder men tuıyq sý aınalymy qondyrǵylaryn qoldanatyn ındýstrııalyq sharýashylyqtardy damytý bar.

Memlekettik qoldaý sondaı-aq jylyna 50 tonnadan bastap qýaty bar balyq sharýashylyǵy sý aıdyndaryndaǵy torly akvaósirýdi damytýǵa, aýmaǵy keminde 50 gektar bolatyn sý aıdyndarynda kól-taýarly balyq ósirýge arnalǵan jabdyqtar men tehnıkany satyp alýǵa, táýligine keminde bir tonna ónim óndiretin balyq óńdeý nysandaryn qurý jáne keńeıtýge, sondaı-aq belgilengen qýattaǵy balyq shabaǵyn óndiretin qaıta óndirý sharýashylyqtaryn damytýǵa da taralady.

Sý resýrstarymen qamtamasyz etý máselesine erekshe kóńil bólingen. № 8 «Jylyna 25 tonnadan bastap akvaósirý nysandaryn ósiretin akvaósirý sýbektilerin, sondaı-aq akvaósirýdi damytýǵa yqpal etetin sýbektilerdi sýmen qamtamasyz etý» pasporty sheńberinde ótemaqy mólsheri ulǵaıtylyp, naqty shyǵyndardyń 50%-yn quraıdy.

Akvasharýashylyq óniminiń ónimdiligi men sapasyn arttyrýdy sýbsıdııalaý baǵytynda da eleýli ózgerister engizildi. Jemshópti, balyq otyrǵyzý materıalyn jáne jóndeý-analyq tabyndy satyp alý kezinde beriletin sýbsıdııalardyń shekti mólsherleri qaıta qaraldy. Sonymen qatar bıýdjet qarajatynyń maqsatty paıdalanylýyn baqylaý talaptary kúsheıtildi. Sharýashylyqtarǵa kóshpeli tekserýler júrgizý, mindetti foto jáne beınetirkeý, sondaı-aq veterınarııalyq qujattardy usyný engizildi.

Osy baǵyt aıasynda akvaósirý nysandaryn ósirýde paıdalanylatyn jemshópti satyp alýǵa jumsalǵan shyǵyndardyń 30%-y, balyq otyrǵyzý materıalyn, bıologııalyq negizdeme ázirleýdi, mamandandyrylǵan dárilik preparattardy, sondaı-aq analyq balyq úıirin satyp alý jáne olardy kútip-ustaý shyǵystarynyń 50% óteledi.

Sonymen qatar, akvasharýashylyq sýbektilerine memlekettik qoldaý retinde jańadan sý berý qyzmetteriniń qunyn sýbsıdııalaý engizildi. Memlekettik qoldaý mólsheri dıfferentsıaldy túrde aıqyndalyp, sý berý tásiline qaramastan, qosylǵan qun salyǵyn esepke almaǵanda tarıftiń 60-85%-yn quraıdy. Bul, ásirese, sý resýrstary shekteýli óńirlerde ornalasqan sharýashylyqtar úshin mańyzdy.

-Jalpy alǵanda, qabyldanǵan sharalar akvaósirý óniminiń ózindik qunyn tómendetýge, salanyń ınvestıtsııalyq tartymdylyǵyn arttyrýǵa jáne balyq sharýashylyǵyn odan ári damytýdyń berik negizin qalyptastyrýǵa baǵyttalǵan,-delingen habarlamada.

Sonymen qatar onda jańa sýbsıdııalaý tetikteri óndiris kólemin ulǵaıtýǵa, ónim sapasyn jaqsartýǵa jáne Qazaqstannyń ishki ári syrtqy balyq ónimderi naryǵyndaǵy pozıtsııasyn nyǵaıtýǵa múmkindik beredi degen úmit bar ekeni aıtylǵan.

Aıta keteıik, keıingi 4 jylda elde balyq ósiretin sharýashylyqtar sany 7 ese ósken.