Qazaqstanda balyq sharýashylyǵymen aınalysatyn qansha kásipkerlik nysany bar
ASTANA. KAZINFORM - Qazirgi ýaqytta Qazaqstanda 681 kásipkerlik sýbektisi balyq sharýashylyǵymen aınalysady. Ótken jyly 26 myń tonna balyq ósirilgen.
Bul týraly Shymkent qalasynda «Akvamádenıet: turaqty ósýdiń ǵylymy, tehnologııalary jáne bıznes-modelderi» atty halyqaralyq forým barysynda málim boldy.
Jıynda sý sharýashylyǵy mádenıetin turaqty damytý jáne salany qoldaý baǵytynda qabyldanyp jatqan sharalar týraly aıtqan Aýyl sharýashylyǵy mınıstrligi Balyq sharýashylyǵy komıteti tóraǵasynyń orynbasary Baýyrjan Jumajanovtyń sózinshe, qoldanystaǵy memlekettik qoldaý tetikteri aıasynda bıologııalyq negizdeme ázirleýge, akvamádenıet nysandaryn ósirýge paıdalanylatyn jemshópti satyp alýǵa, balyq shabaqtaryn alýǵa, preparattardy satyp alýǵa, analyq balyqtar tobyn qalyptastyrýǵa jáne ony kútip-ustaýǵa jumsalǵan shyǵyndardy óteý qarastyrylǵan.
Sonymen qatar, sý berý qyzmetteriniń qunyn sýbsıdııalaý da kózdelgen.
- Qabyldanǵan sharalar akvamádenıet óniminiń ózindik qunyn tómendetýge, salanyń ınvestıtsııalyq tartymdylyǵyn arttyrýǵa jáne elimizdegi balyq sharýashylyǵynyń turaqty damýyn qamtamasyz etýge baǵyttalǵan», – dep atap ótti Baýyrjan Jumajanov.
Forým barysynda qatysýshylar akvamádenıet salasyndaǵy zamanaýı tehnologııalardy, ǵylymı negizdelgen sheshimderdi, ınvestıtsııalyq múmkindikterdi jáne salany damytýdyń tıimdi bıznes-modelderin talqylady.
Halyqaralyq forým akvamádenıettiń ǵylymı, tehnologııalyq jáne ınvestıtsııalyq áleýetin damytýǵa baǵyttalǵan kásibı dıalog alańyna aınaldy.
Sondaı-aq mundaı is-sharalar bilim almasýǵa, halyqaralyq yntymaqtastyqty damytýǵa jáne birlesken jobalardy júzege asyrýǵa berik negiz qalyptastyratyny aıtyldy.
Іs-sharaǵa Qytaı, Reseı, Qyrǵyzstan jáne Ózbekstan elderinen kelgen ǵalymdar men balyq ósirýshiler, sarapshylar, memlekettik organdar men bıznes ókilderi qatysty.
Osyǵan deıin elimizde balyq sharýashylyǵyn memlekettik qoldaýdyń keshendi sharalary iske qosylǵany týraly jazdyq.
