Qazaqstanda balyq ónimderine syrttan táýeldilik 15 paıyzǵa azaıdy
ASTANA. KAZINFORM – Óńirlerde balyq ósirý jáne balyq ónimderin óńdeý salasy qarqyndy damyp keledi.
2021-2024 jyldar aralyǵynda balyq ósirý men óńdeýge baǵyttalǵan 87 joba júzege asyryldy. Olardyń jalpy quny 21,4 mıllıard teńgeni quraıdy. Іske qosylǵan nysandar jylyna 20 myń tonnadan astam ónim shyǵarýǵa múmkindik beredi. Bul sharalardyń nátıjesinde balyq ónimderin syrttan ımporttaý kólemi 15 paıyzǵa azaıdy.
Ótken jyly jyldyq ónim kólemi 1,2 myń tonnadan asatyn taǵy 8 joba paıdalanýǵa berildi. Olardyń biri – Mańǵystaý oblysyndaǵy teńiz torlarynda balyq ósirý boıynsha sharýashylyq. Bul joba Ortalyq Azııada alǵash ret Kaspıı teńizinde júzege asyryldy. «Organic Fish» kompanııasy norvegııalyq tehnologııany qoldana otyryp iske asyrǵan jobanyń quny 12 mıllıard teńge, jyldyq óndiristik qýaty 5 myń tonna albyrt tuqymdas balyq shyǵarýǵa jetedi. 2023 jyldyń qarasha-jeltoqsan aılarynda teńiz torlaryna salmaǵy 200 gramm bolatyn albyrt tuqymdas balyq shabaqtary jiberildi. Qazirgi ýaqytta joba tájirıbelik kezeńde.
Sonymen qatar 2030 jylǵa deıin quny 54 mıllıard teńge bolatyn 40 joba iske asyrylmaq. Bul jobalar balyq ósirý kólemin 14,4 myń tonnaǵa, al balyq óńdeý kólemin 10 myń tonnaǵa deıin arttyrýǵa múmkindik beredi. Sonymen birge jylyna 6,8 myń tonnaǵa deıin balyq jemin óndirý josparǵa engizildi.
Salany damytý jáne balyq ósirý qarqynyn turaqty ustaý úshin arnaıy balyq jemi qajet. Osy maqsatta Almaty, Aqmola jáne Mańǵystaý oblystarynda memlekettik qoldaý arqyly balyq jemin óndiretin zamanaýı zaýyttar salý máselesi qarastyrylyp jatyr.
Memleket tarapynan qarjy salymdarynyń bir bóligin óteý jáne balyq ósirýmen aınalysatyn sharýashylyqtarǵa jeńildetilgen nesıe berý sharalary qarastyrylǵan. Bul sharalar salanyń turaqty damýyna yqpal etedi.
Eske salsaq, buǵan deıin Qazaqstanda balyq sharýashylyǵymen aınalysatyn qansha kásipkerlik nysany bar ekenin jazǵan edik.
