Qazaqstanda balanyń kompıýtermen vırtýaldy túrde kisi ólimin jasaýǵa, azaptap-qorlaýǵa jol berilmeıtin boldy
ASTANA. 23 sáýir. QazAqparat - Balalarǵa arnalǵan aqparattyq ónimderge jas synyptamasyn qamtıtyn saraptama júrgiziletin bolady.
Búgin Májilistiń Áleýmettik-mádenı damý komıtetiniń kóshpeli otyrysynda «Balalardy densaýlyǵy men damýyna zardabyn tıgizetin aqparattan qorǵaý týraly» zań jobasynyń tanystyrylymy barysynda depýtat Aldan Smaıyl osylaı málim etti.
Depýtattyń aıtýynsha, saraptama aqparattyq ónimniń janryn, taqyrybyn, mazmunyn, bezendirilýin, aqparattyq ónimdi usynýdyń tásilin, balalarǵa jasyryn áser etetin arnaýly ádisterdiń bar-joǵyn, balanyń aqparattyq ónimdi birneshe qaıtalap kórýin aıqyndaıdy. Mundaı saraptama aqparattyq ónim Qazaqstan aýmaǵynda taratylǵanǵa deıin júrgiziledi jáne bul sol ónimdi óndirýshige júkteledi.
«Balalarǵa arnalǵan aqparattyq ónimniń jas sanattary zań jobasy boıynsha birqatar kategorııaǵa júkteledi. Atap aıtqanda, 6 jasqa deıingi, 6 jastan bastap 12 jasqa deıingi, 12 jastan bastap jáne 16 jastan bastap. Bulardyń barshasyna naqtyly talaptar qoıylǵan jáne efırde taratý merzimderi, bala úshin qolaıly ýaqyttary atap kórsetilgen», - deıdi A. Smaıyl.
Onyń sózine qaraǵanda, qujatta respýblıka tarıhynda alǵash ret kompıýterlik jáne basqa da elektrondyq oıyndardy taratýshynyń mindetteri saralanyp otyr.
«Biz osy oıyndarda balalarǵa usynýǵa tyıym salynǵan aqparatyq ónimderge tán kórinisterdiń bolmaýyna qol jetkizýdi oılastyrdyq. Olarda agressıvtik kúsh kórsetýler jáne ózge de qoǵamǵa jat is-áreketter men arandatatyn sıýjetter kezdespeýge tıis. Kompıýter arqyly balany vırtýaldyq kisi ólimine, azaptaý, qorlaý, jábirleý jáne basqa da árekettestikter men áreketterdi qoldan jasaı alýyna jol bermeý talap etiledi. Bunymen qosa, balalarǵa arnalǵan baspa, dybys, beıne ónimderde balanyń densaýlyǵy men damýyna zııanyn keltiretin aqparattar bolmaýy tıis», - dedi A. Smaıyl.
