Qazaqstanda balanyń sportqa beıimin anyqtaıtyn AI platforma ázirlendi
ASTANA. KAZINFORM — Balanyń qaı sportqa beıimi baryn endi jattyqtyrýshy ǵana emes, jasandy ıntellekt te anyqtaıdy. Qazaqstandyq mamandar AI Sport atty tyń platforma ázirlegen. Joba búgin elordada ótken Sport Tech konferentsııasynda tanystyryldy.
Platformada 57 jattyǵý tsıfrlanǵan. Júıe balanyń qozǵalysyn, reaktsııasy men jattyǵý tehnıkasyn taldaıdy. Sonyń negizinde laıyqty sport túrin usynady. Al nátıjesi sport federatsııalaryna jiberiledi.
Bul ásirese aýyldaǵy balalardyń qabiletin erte baıqaýǵa múmkindik beredi. Qazir platformany 3 myńǵa jýyq adam paıdalanyp júr.
— Bir bala kúsh jattyǵýlaryn jaqsy oryndaýy múmkin. Ekinshisiniń reaktsııasy men koordınatsııasy joǵary bolady. Platforma osy kórsetkishterdi jınap, taldaý arqyly balanyń qaı sport baǵytyna beıimi joǵary ekenin anyqtaýǵa kómektesedi. Nátıjesinde tıisti aqparat sport federatsııalaryna usynylady. Bul derekter jattyqtyrýshynyń jeke kabınetinde de kórinedi, — dedi AI Sport platformasynyń dırektory Ǵabıt Saltabaev.
AI Sport platformasy tórt aı buryn iske qosylǵan. Alaıda joba avtorlary oǵan deıin eki-úsh jyl boıy sport pen tehnologııany ushtastyrý baǵytynda zertteý júrgizgen.
— Ózim basketboldan sport sheberimin. Sport salasynda 20 jyldan astam ýaqyt jumys istep kelemin. Tehnologııa baǵytyna úsh jyl buryn keldim. AI Sport — osy baǵyttaǵy úshinshi jobamyz. Aldyńǵy jobalardyń tájirıbesine súıenip ázirledik, — dedi Ǵabıt Saltabaev.
Platformada jalpy jattyǵýlardan bólek, sporttyń alty baǵytyn tsıfrlandyrý jumysy júrip jatyr. Olardyń qatarynda basketbol, ústel tennısi, fýtbol, boks jáne dzıýdo bar.
Mysaly, ústel tennısinde júıe sportshynyń qozǵalysyn, soqqy tehnıkasyn jáne jyldamdyǵyn taldaı alady. Oń jáne sol jaqtan jasalǵan soqqylardy baǵalap, sportshynyń qatelerin kórsetýge múmkindik beredi.
Joba avtorlarynyń aıtýynsha, jasandy ıntellekt jattyqtyrýshyny almastyrmaıdy. Kerisinshe, mamannyń jumysyn jeńildetip, sportshynyń nátıjesin júıeli baqylaýǵa kómektesedi.
— Bizdiń maqsatymyz — jattyqtyrýshyny almastyrý emes. Oǵan qosymsha qural usyný. Sportshynyń kúndelikti jattyǵýy týraly derekter jınaqtalsa, maman onyń progresin baqylap, jattyǵý protsesin tıimdi josparlaı alady, — dedi ol.
Búgingi jıyn barysynda Qazaq ulttyq sport ýnıversıtetimen yntymaqtastyq týraly memorandýmǵa qol qoıdy. Endi ýnıversıtettiń ǵylymı ortalyǵy bazasynda sport, tehnologııa jáne jasandy ıntellekt baǵyttaryn ushtastyratyn zertteýler júrgiziledi.
Ári, bul platformada oqytýshylar men stýdentterge arnalǵan jeke kabınetter de bar. Oqytýshylar stýdentterge úı tapsyrmasyn berip, olardyń jattyǵý nátıjesin de baqylaı alady.
AI Sport ázirleýshileri platformany aldaǵy ýaqytta shetel naryǵyna shyǵarýdy da josparlap otyr.
— Júıe buqaralyq sportty qoljetimdi etýge baǵyttalǵan. Paıdalanýshylar úshin negizgi múmkindikter men chellendjder tegin usynylady, al korporatıvtik kompanııalarǵa arnalǵan qyzmetter jazylym negizinde kórsetiledi, — dedi ol.
Aıta keteıik, jasandy ıntellektige negizdelgen otandyq startap Tokıodaǵy forýmda tanystyrylmaq.
