Qazaqstanda balamaly qýat kózderimen júretin avtokólikter úshin ınfraqurylym jasalady
ASTANA. QazAqparat - Qazaqstanda balamaly qýat kózderimen júretin avtokólikter úshin ınfraqurylym jasalady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Qorshaǵan orta jáne sý resýrstary mınıstri Nurlan Qapparov málim etti.
«Qazirgi joldar ınfraqurylymy elektromobılderdi qoldanýǵa múmkindik bermeıdi. Gaz tasymaldaý ınfraqurylymy da damymaǵan. Sonyń saldarynan kólik salasynda kógildir otyndy qoldaný múmkindigi tómen»,- dedi ol.
N.Qapparovtyń atap ótýinshe, sondyqtan mınıstrlik gaz, elektr qýaty jáne basqa da balamaly qýat kózderimen júretin avtokólikter úshin ınfraqurylymdy quryp, damytýdy qolǵa almaq.
«Sondaı-aq kólikterdi taza qýat kózderine aýystyrý boıynsha memlekettik qoldaý sharalary qarastyrylady», - degen mınıstr elimizde velosıpedter júretin joldar ınfraqurylymyn jáne osy kólik túrlerin jalǵa alý beketterin qurý máseleleri anyqtalatyndyǵyn basa aıtty.
