Qazaqstanda balamaly energııa kózderi boıynsha halyqaralyq aýktsıon mamyrda ótedi
Úkimet úıinde baspasóz máslıhatyn ótkizgen Energetıka vıtse-mınıstri Ǵanı Sádibekov Elbasy Joldaýyndaǵy basymdyqtardyń biri - jańartylǵan energııa úlesterin arttyrý, jasyl tehnologııalarǵa kóshý, turmystyq qaldyqtardy kádege jaratý ekenin atap ótti.
Onyń aıtýynsha, bul baǵyt zańnamany, onyń ishinde ekologııalyq kodeksti ózektendirýge, ekonomıkany ekologııalandyrý úshin qolaıly jaǵdaı jasaýǵa múmkindik týǵyzady.
«Biz kelesi maqsattardy kózdeımiz: elektr energetıkasynda 2030 jylǵa qaraı balamaly jáne jańartylatyn energııa úlesin 30 paıyzǵa deıin jetkizý qajet. Jańartylǵan energııa naryǵy jyl saıyn ósip keledi. 2017 jyly 1 mlrd kılovat/saǵat energııa óndirildi. Bul 2016 jyldyń kórsetkishinen 22 paıyzǵa artyq. 2018 jyldyń jospary - 2,7 mlrd kılovat/saǵat energııa óndirý», - deıdi ol.
Ǵanı Sáidbekovtyń sózine sensek, byltyr jańartylatyn energııa kózderiniń bes nysany paıdalanýǵa berilse, bıyl jalpy qýaty 123 megavatty quraıtyn 10 nysandy iske qosý josparlanǵan.
«Jańartylatyn energııa kózderiniń odan ary damýyn biz aýktsıondyq mehanızmge kóshýden kóremiz. Bul bir jaǵynan jobalar men ınvestorlardy tańdaýǵa, protsessti ashyq ári túsinikti etýge, ekinshi jaǵynan jańartylǵan energııa kózderin engizýge múmkindik beredi. Bul júıe jańartylatyn energııa kózderiniń eń ekonomkıalyq tıimdi jobalaryn damytýǵa serpin beredi. Ústimizdegi jyly alǵash ret jalpy qýaty 1 gegavatty quraıtyn jańartylatyn energııa kózderi jobalaryna halyqaralyq aýktsıondyq satylymdar engizý josparlanýda. Birinshi satylymdardy mamyr aıynda ótkizý kózdelgen», - dedi vıtse-mınıstr.
Aýktsıondyq satylymdardy ótkizý týraly málimet resmı ınternet resýrstarynda jarııalanady. Іrikteýdiń sharttary barlyq kásiperlerdiń teńdigin saqtaı otyryp, qatysýshylar úshin biryńǵaı bolady.
«Oǵan azamattyǵyna qaramastan kez kelgen nıet bildirýshi qatysa alady. Aýktsıondyq satylymdarǵa qatysýǵa otandyq bıznesten basqa qazirdiń ózinde Saýd Arabııasy, Kanada, AQSh, Qytaı sekildi shetelderdiń kompanııalary nıet bildirip otyr. Aýktsıondy tabysty ótkizý arqyly biz eki máseleni sheshemiz. Birinshiden, jańartylatyn energııa kózderiniń quny men elimizdiń ekonomıkasyna yqpal etý deńgeıin tómendetsek, ekinshiden, jańartylatyn energııa kózderi salasyndaǵy ozyq tehnologııalardy tartamyz», - dep túıdi Ǵanı Sádibekov.
