Qazaqstanda balama sot ádildigi týraly zańnamany jetildire túsý qajet

Búgin QR Parlamenti Senatynda balama sot ádildigi problemalaryn talqylaýǵa arnalǵan jıyn barysynda QR Ádilet vıtse- mınıstri Marat Beketaev osylaı málim etti, dep habarlaıdy QazAqparat.

«Sońǵy ýaqytta zańnamalyq turǵyda qabyldanǵan sharalarǵa qaramastan, balama sot ádildigi baǵytyndaǵy zańnama jetildire túsýdi qajet etedi dep sanaımyz. Elbasynyń jarlyǵymen bekitilgen Qazaqstannyń 2010-2020 jylǵa deıingi quqyqtyq saıasat tujyrymdamasynda memlekettiń azamattyq-quqyqtyq qatynastarǵa qatysýy máselesin odan ári jetildirý jáne jeke quqyqtyq qatynas salasyndaǵy ımmýnıtetten bas tartý sharalary qarastyrylǵan bolatyn. Bul halyqaralyq talaptarǵa sáıkes keledi», dedi vıtse- mınıstr. Onyń paıymdaýynsha, quqyqtyq bolmysy jaǵynan aralyq (treteılik) jáne tórelik (arbıtrajdy) sottar bir birine uqsas ári bulardyń daýlardy qaraý úderisi kóbinese qabysyp jatady. Al osy eki sottyń arasyndaǵy quzirettilik rezıdenttiń belgilerine qaraı anyqtalady. Atap aıtqanda, rezıdentter arasyndaǵy daýlar aralyq sottarda, al taraptar arasyndaǵylardyń bireýi rezıdent emes bolyp tabylsa, bundaı daýlar tórelik sottarda qaralady.

«Degenmen, ulttyq zańnamamyzda aralyq sottar men tórelik sottar eki túrde qarastyrylǵan. Osyǵan oraı, biz osy máseleni tereń saralaı kele, aldaǵy ýaqytta bul eki zańdy biriktirýge bolady dep esepteımiz. Sonymen birge, qazirgi kúni tájirıbelik turǵydaǵy sharalardy qabyldaýdyń da kezi jetti. Atap aıtqanda, búgingi kúni Qazaqstanda jumys istep, qyzmet etip otyrǵan tórelik jáne aralyq sottar týraly aqparat joqtyń qasy. Osyndaı málimetter bazasyn ázirleýdiń mańyzy zor, bunyń ózi elimizdegi balama sot úlgileriniń damýy týraly jalpy maǵlumattardy qamtıtyn edi», dedi M. Beketaev.