Qazaqstanda balalarǵa zorlyq-zombylyq kórsetý deńgeıi tómendedi — ıÝNISEF
ASTANA. KAZINFORM — Qazaqstanda ata-analar tarapynan balalardy tárbıeleý kezinde zorlyq-zombylyq elementterin qoldaný aıtarlyqtaı azaıǵan. Bul týraly ıÝNISEF-tiń Eýropa jáne Ortalyq Azııa elderi boıynsha bala quqyqtaryn qorǵaý jónindegi óńirlik keńesshisi Aaron Grınberg málimdedi, dep habarlaıdy Jibek Joly News.
Atalǵan derekter halyqaralyq «MIKS» zertteýiniń nátıjesinde anyqtaldy. Býharest qalasynda ótken Eýropa jáne Ortalyq Azııa elderiniń halyqaralyq konferentsııasynda Qazaqstan tájirıbesi ózge memleketterge úlgi retinde kórsetildi. Konferentsııa jumysyna 32 eldiń úkimet ókilderi qatysty.
— «MIKS» zertteýiniń nátıjelerine sáıkes, Qazaqstanda balalardy tárbıeleý barysynda zorlyq-zombylyq ádisterin qoldaný deńgeıi tómendep keledi. Bul — júıeli aldyn alý sharalary men memleket júzege asyryp otyrǵan saıasattyń nátıjesi. Eń mańyzdysy osyndaı oń ózgeristerdiń sebepterin túsinip, basqa elderge úlgi etý, — dedi Aaron Grınberg.
Іs-shara barysynda Bala quqyqtary jónindegi ýákil Dınara Zakıeva Prezıdent Qasym-Jomart Toqaevtyń bastamalary men reformalary týraly baıandady. Ol elimizdegi oń nátıjelerge nazar aýdaryp, zorlyq-zombylyq deńgeıiniń tómendeýin atap ótti.
— Qazaqstan ata-analar tarapynan balalardy tárbıeleý kezinde zorlyq-zombylyq elementterin fızıkalyq jaza men psıhologııalyq qysymdy qoldaný deńgeıi aıtarlyqtaı tómendegen el retinde ataldy. Kórsetkish 53 paıyzdan 38 paıyzǵa deıin azaıdy. Bul balalardyń quqyqtaryn qorǵaý salasyndaǵy júıeli jumystyń jáne aldyn alý sharalarynyń nátıjesi, — dedi Dınara Zakıeva.
ıÝNISEF-tiń óńirlik dırektory Redjına de Domınıchıs óz kezeginde qazaqstandyq tájirıbeni halyqaralyq deńgeıde úlgi retinde kórsetýge bolatynyn aıtty. Ol ásirese QR-111 jedel jelisin jáne zorlyq-zombylyq pen býllıngtiń aldyn alýǵa baǵyttalǵan barlyq tetikti biriktiretin SAFE platformasyn joǵary baǵalady.
Buǵan deıin bilim berý mekemelerinde býllıngke qarsy ınnovatsııalyq júıe engizilgenin jazǵanbyz.
Sonymen qatar elimizdiń 9 óńirinde mektepte býllıngtiń aldyn alýǵa jáne ony azaıtýǵa baǵyttalǵan otandyq «DosbolLIKE» baǵdarlamasynyń aprobatsııasy sátti aıaqtalǵanyn jazǵanbyz.