Qazaqstanda balalarǵa zııandy kontent taratqan 38 myńnan astam ınternet-resýrs buǵattaldy

ASTANA. KAZINFORM – «Kıberqadaǵalaý» monıtorıng júıesiniń arqasynda elde balalarǵa zııandy ári zańǵa qaıshy aqparat taratqan 38 myńnan astam ınternet-resýrs anyqtalyp, buǵattaldy, dep habarlaıdy Balalardyń quqyqtaryn qorǵaý komıteti.

Balalardyń tsıfrlyq ortada belsendi bolýy jáne jasóspirimderdiń onlaın keńistikke tereń boılaýy ata-analar men mamandardan jańa daǵdylardy talap etedi. Komıtet dereginshe, onlaın qaýipterdiń aldyn alýdaǵy mańyzdy tetik – otbasy tarapynan baqylaý.

«Ata-ana baqylaýyn kúsheıtý óte mańyzdy. Bala qandaı saıttardy qaraıtynyn, kimmen onlaın baılanys jasaıtynyn qadaǵalaý qajet. Sondaı-aq qurylǵylarda ata-ana baqylaýy fýnktsııalaryn qosyp qoıǵan jón. Bul qaýip-qaterdi der kezinde anyqtap, balany zııandy kontentten qorǵaýǵa múmkindik beredi», – dedi Balalardyń quqyqtaryn qorǵaý komıtetiniń tóraǵasy Nasymjan Ospanova.

Qazaqstanda balalardy zııandy aqparattan qorǵaý júıesi «Balalardy densaýlyǵy men damýyna zardabyn tıgizetin aqparattan qorǵaý týraly» zań talaptaryna negizdelgen. Qujat memlekettik organdardyń ókilettikterin, sondaı-aq qaýipti kontentke monıtorıng júrgizý, taldaý jáne buǵattaý tetikterin aıqyndaıdy.

2022 jyly zańnamaǵa «býllıng» jáne «kıberbýllıng» uǵymdary engizildi. 2024 jyldan bastap jábirleý úshin ákimshilik jaýapkershilik belgilengen. Bıylǵy 10 aıda 339 ákimshilik is tirkelip, onyń 198-i býllıng faktileri boıynsha jaýapkershilikke tartylǵan.

Aıta keteıik, balalardyń áleýmettik jelige tirkelýin jasyna qaraı shekteý usynyldy.