Qazaqstanda balalarǵa óndirip alynatyn alıment mólsheri qaıta qaralýy múmkin
Bul týraly Alımentter óndirip alý jónindegi úılestirý keńesiniń otyrysynda QR Bas prokýrorynyń birinshi orynbasary Iogan Merkel málim etti.
«Birinshiden, alıment mólsherin belgileý tártibin qaıta qaraýdy usynamyz. Búgingi kúni ol boryshkerdiń eńbekaqysynyń úlesterinde aıqyndalady jáne balalardan góri ákeniń múddeleri eskerilgen», - deıdi ol.
Onyń ústine, «aılaker» boryshkerler zańdy aınalyp ótýdiń tásilin ıgergen.
«Olar jalaqysy tómen jumystarǵa ornalasqan jaǵdaılardy mysalǵa keltirip óttim. Sodan keıin, zańdy túrde balalaryna 5-6 myń teńgeden aýdaryp otyrǵan. Búgin bul aqshaǵa balany tamaqtandyrýǵa, kıindirýge bola ma? Sondyqtan balanyń múddeleri basymdyqty bolýy tıis dep oılaımyz. Balanyń jasyna qaraı alımentterdiń bazalyq mólsherine zańmen kepildeme berilýi tıis. Boryshkerdiń tabysyn da eskerýdi usynamyz. Biraq, tek mynadaı prıntsıp boıynsha - eńbekaqy qanshalyqty joǵary bolsa, alımentterdiń mınımaldy mólsheri sonshalyqty joǵary bolýy tıis», - dep túıdi sózin I. Merkel.
Aıta keteıik, bunyń aldynda habarlaǵanymyzdaı, Qazaqstanda alımentter boıynsha qaryz 2 mlrd. teńgege jýyqtaǵan. Búginde elimizde 350 myńnan astam bala alımentke muqtaj.