Qazaqstanda balalarǵa qatysty zorlyq-zombylyqtyń aldyn alý úshin arnaıy psıhologtar daıyndalýda
ASTANA. QazAqparat - Qazaqstanda balaǵa qatysty zorlyq-zombylyqtyń aldyn alý úshin arnaıy psıhologtar daıyndalýda. Bul týraly búgin Ortalyq kommýnıkatsııalar qyzmetinde Otbasy tárbıesi ınstıtýtynyń bas dırektory Sofıa Evdokımova málim etti.
«Bes jyl ishinde Instıtýttan myńdaǵan ata-ana men bala ótti. Maskúnemdik, kámelettik jasqa tolmaǵandarǵa qatysty kúshteý men ozbyrlyq sııaqty áleýmettik máselelerdiń barlyǵy otbasydan. Ata-ananyń tárbıe biliminiń joqtyǵynan. Biz olardyń bilim kókjıegin keńeıtip, bala tárbıesinde kómektesý úshin óz mamandarymyzdy tartyp kelemiz», - deıdi S. Evdokımova.
Onyń atap kórsetkenindeı, osy maqsatta otbasylyq qarym-qatynastarǵa mamandanǵan psıhologtardyń biliktiligin arttyrý jumystary jasalýda.
«Bizdiń ınstıtýt psıhologtardyń biligin jetildiretin ortalyq ashty. Elimizde bilim berý salasynda shamamen 12 myńnan astam psıholog bar eken. Al bizdiń ınstıtýtpen 1700 psıholog daıarlandy. Bul Qazaqstanda otbasylyq máselelerdi aldyn alý boıynsha jasalyp jatqan jumystardyń tek bir parasy ǵana. Bizdiń qateligimiz sol, elde otbasylyq tárbıe kafedrasy bolmady, búgin sol olqylyqty birtindep túgendep kelemiz», - deıdi ol.
