Qazaqstanda balalarǵa qatysty zorlyq-zombylyq artyp barady - májilismen
ASTANA. QazAqparat - Qazaqstanda pedofılııa órship barady. QR Parlament Májilisiniń jalpy otyrysynda májilismen Zaǵıpa Balıeva osylaı dep dabyl qaqty, dep habarlaıdy «QazAqparat» HAA tilshisi.
Otyrys kezinde Parlament Májilisiniń depýtaty QR Premer-Mınıstriniń atyna depýtattyq saýal joldady. Onyń aıtýyna qaraǵanda, búgingi tańda búkil dúnıe júzinde balalarǵa qarsy zorlyq-zombylyq jaǵdaılary erekshe úreı týǵyzady. Ókinishke qaraı, Qazaqstanda da bul másele joq dep aıtýǵa bolmaıdy.
«Eger 2017 jyldyń 9 aıy men 2016 jyldyń dál sol merzimdegi kórsetkishin salystyrar bolsaq, Quqyqtyq statıstıka keltirgen málimet boıynsha, kámeletke tolmaǵan balalarǵa qarsy qylmystyń artqanyn kórýge bolady. Naqtyraq aıtqanda, zorlaý qylmysynyń sany (QK-tiń 120-baby) jaǵdaıy 100-den 133-ke artqan. Ósim - 33 paıyz. Seksýaldy minezdemede zorlyq-zombylyq áreketteri 83-ten 108 jaǵdaıǵa jetip, ósim 31 paıyzdy kórsetip otyr. 2016 jyly qylmyskerlerdiń qolynan 180-ge jýyq bala zardap shekken. 2015 jylmen salystyrǵanda az degenimizben, fakttyń aty fakt - pedofılııa elde órship tur», - deıdi depýtat.
Májilismen óz sózinde adamı qalypqa saı kelmeıtin sondaı qylmysy úshin qylmyskerler barynsha qatań, tipti ólim jazasyna kesýge deıingi jazaǵa laıyq. Al bizdiń elde 2018 jyldan bastap hımııalyq kastratsııa jasaý normasy engizilgeli jatyr.
«Qazirgi ýaqytta atalǵan norma boıynsha erejeler bekitilip qoıǵan. Alaıda men ýákiletti adam retinde densaýlyq saqtaý jáne qylmystyq atqarý júıeleriniń mekemeleri bul jumysqa qanshalyqty daıyn ekenin bilgim keledi. Eger bas bostandyǵyn aıyrý oryndarynda bul jumysty qalaıda sheshýge bolady degenimizben, jazasyn ótep ketken nemese osy qylmysy úshin jazanyń basqa túrin alǵan adamdardy ne isteý kerek? Atalǵan normanyń qalaı júzege asyrylatyny týraly tolyqqandy bilgim keledi», - deıdi Zaǵıpa Balıeva.
