Qazaqstanda «Balalarǵa degen súıispenshilikpen» áleýmettik jobasy bastaldy
«Astanada Qazaqstan Respýblıkasy Densaýlyq saqtaý jáne áleýmettik damý, Bilim jáne ǵylym mınıstrlikteriniń, Amway kompanııasynyń qoldaýymen «Bolashaq úshin jaýapty» qaıyrymdylyq qorynyń ata-anasynyń qamqorlyǵynsyz qalǵan jáne jetim balalardy otbasylarǵa ornalastyrý boıynsha «Balalarǵa degen súıispenshilikpen» áleýmettik jobasy bastaldy. Jobanyń iske asyrylýy áleýmettik qyzmetkerlerge arnalǵan «Balalar úıiniń otbasyna ornalastyrylǵan balalardy súıemeldeýdegi róli» taqyrybyndaǵy semınar-trenıngten bastaý aldy. Onyń maqsaty - balalar úıiniń qyzmetkerlerin tárbıelenýshilerdi otbasynda ómir súrýge beıimdeý jumystaryna úıretý», delingen habarlamada.
Semınarǵa Qazaqstan Respýblıkasy Densaýlyq saqtaý jáne áleýmettik damý mınıstrliginiń, Qazaqstan Respýblıkasy Bilim jáne ǵylym mınıstrligi Balalardyń quqyqtaryn qorǵaý komıtetiniń, oblystyq densaýlyq saqtaý basqarmalarynyń ókilderi jáne óńirlerden kelgen oblystyq balalar úıleriniń dırektorlary qatysty. Áleýmettik jetimdiktiń (ata-analary ártúrli sebeptermen olardyń tárbıesimen aınalyspaıtyn tiri jetimderdiń) máseleleri, «qaıta oryn alǵan jetimdik fenomeni» (balany tárbıeleýge alǵan otbasynyń balany jetimder úıine qaıtarýy) búgin qazaqstandyq qoǵam úshin ózekti bolyp otyr. Olardy sheshý júıeli kózqaras, balany asyrap alýshy ata-analardy jáne áleýmettik qyzmetkerlerdi oqytý arqyly múmkin bolmaq. Semınardyń baǵdarlamasy túrli jattyǵýlardy oryndaý, shaǵyn toptarda jumys jasaý jáne pikirtalasqa qatysý arqyly trenıng formatynda ázirlendi. Qatysýshylardy tájirıbeli jattyqtyrýshy mamandar oqytady. Semınardyń sońynda qatysýshylarǵa trenıngten ótkeni týraly belgilengen úlgidegi sertıfıkat berildi. «Balalarǵa degen súıispenshilik» atty grantty baıqaý 2013 jyldan beri ótkizilip keledi.