Qazaqstanda balalarǵa arnalǵan shyǵarmashylyq úıirmeleriniń baǵasy qansha
ASTANA. KAZINFORM — Jańa oqý jyly bastalar shaqta ata-analar úıirmelerge jumsaıtyn shyǵynyn taǵy bir eseptep jatyr. Shyǵarmashylyq baǵyttaǵy qosymshalardyń baǵasy qalaǵa jáne tańdaýǵa qaraı ózgerip otyrady. Eń arzany men qymbatynyń arasyndaǵy aıyrmashylyq birneshe myńǵa jetti.
Qazaqstannyń 20 qalasyndaǵy baǵany salystyra kele, vokal jáne mýzykalyq aspapta oılaýdy úıretetin úıirmeler baǵasyndaǵy aıyrmashylyq alshaq ekenin bildik. Al sýret salý ónerine mashyqtaný baǵasy áldeqaıda tómen.
Taldaýǵa án, bı, mýzykalyq aspapta oınaý jáne sýret salý óneri kirdi. Árqaısysynyń eń arzany men qymbatyn bilip, aılyq ortasha kórsetkishi esepteldi.
Vokal: 8 myń teńgeden 42 myńǵa deıin
Án úıirmesiniń baǵasy Aqtóbe qalasynda 8 myń teńgeden bastalsa, Óskemende vokalǵa qatysatyndar aıyna 42 myń teńgege deıin jumsaıdy. Al 20 qaladaǵy ortasha baǵa shamamen aıyna 25,2 myń teńgege shyqty.
Astana qalasynda úıirme quny 35 myń teńge, Almatyda 30 myń, Tarazda 40 myń, al Oral, Petropavl, Pavlodar men Semeıde 30 myń teńge bolyp tur.
Qoljetimdi qalalar tizimde Qostanaı bar. Aıyna — 17 myń teńge. Al Taldyqorǵanda 16 myń, Túrkistan men Qyzylordada 15 myń teńge.
Qorytyndy: eń tómen baǵa — 8 myń teńge, eń joǵary baǵa — 42 myń teńge, ortasha kórsetkish — 25,2 myń teńge.
Bı — 14 — 30 myń teńge aralyǵynda
Elimizde bı úıirmesiniń baǵasy ózgelerge qaraǵanda turaqty. Eń arzany — Petropavl qalasynda. Úıirme quny — 14 myń teńge. Eń qymbaty — Astana, Almaty, Óskemen qalalarynda. Baǵasy — 30 myń teńge.
Elimizdegi ortasha baǵa aıyna 20,6 myń teńge shamasynda.
Qalalardyń kóbinde bı úıirmesiniń baǵasy 15-25 myń teńge aralyǵynda. Máselen Túrkistanda 15 myń, Qostanaıda 15 myń, Taldyqorǵanda 16 myń, Qyzylordada 16 myń, Pavlodarda 25 myń teńge bolyp tur.
Qorytyndy: eń arzany — 14 myń teńge, qymbaty — 30 myń teńge, ortasha baǵasy — 20,6 myń teńge.
Mýzykalyq aspaptar úıirmesi — eń qymbat baǵyt
Tańdalǵan úıirmeler ishinde eń qymbaty — mýzykalyq aspapty úıretýge arnalǵan baǵyt. Aıyna orta eseppen 28,9 myń teńge kerek.
Aqtóbe qalasynda 10 myń teńgeden bastalsa, Astana qalasynda 45 myń teńgege deıin jetti. Almaty men Óskemende bir aılyq sabaqqa 40 myń teńge tóleıdi. Qonaevta da 40 myń teńge bolsa, Atyraý, Qaraǵandy, Jezqazǵan men Semeıde baǵa — 35 myń teńge.
Aqtaý, Túrkistan, sonymen birge ózge de qalalarda úıirme baǵasy 15 myń teńge bolyp tur.
Qorytyndy: eń arzany — 10 myń teńge, eń qymbaty — 45 myń teńge, ortasha baǵa — 28,9 myń teńge.
Beıneleý óneri: 8 — 30 myń teńge aralyǵynda
Qazaqstandyqtar balany sýret salý ónerine baýlý úshin aıyna orta eseppen 19,4 myń teńge tóleıdi.
Aqtóbe qalasynda eń arzany 8 myń teńge bolsa, qymbat qalalar tizimindegi Astana men Almatyda 30 myń teńgege jetti.
Taldyqorǵan men Túrkistanda úıirme baǵasy 16 myń jáne 10 myń teńge. Shymkent pen Tarazda — 15 myń teńge, Qyzylordada — 15 myń teńge, Óskemende — 20 myń teńge.
Qorytyndy: eń arzany — 8 myń teńge, qymbaty — 30 myń, ortashasy — 19,4 myń teńge.
Úıirme baǵasy qaıda qymbat
Eger tańdalǵan tórt úıirmeniń baǵasyna taldaý júrgizsek, bireýine jazylý quny aıyna orta eseppen 23 500 teńgege shyǵady. Eskere ketetin jaıt, bir balaǵa jumsalatyn qarjynyń ortasha kórsetkishi óńirlerge qaraı ózgerip otyrady. Astana qalasynda tórt úıirme quny aıyna 140 myń teńgege shyqsa, Almatyda 130 myń teńge, Óskemende 132 myń teńge.
Eń arzany Aqtóbe qalasynda. Orta eseppen — 46 myń teńge. Tórt baǵyt Túrkistanda 55 myń teńge, Taldyqorǵanda 64 myń teńge.
Qaraǵandy qalasynda tórt úıirme quny 100 myń teńge, Shymkentte 95 myń, Tarazda 105 myń, Qonaevta 110 myń teńge.
Demek Qazaqstanda baǵa úıirmege baılanysty ǵana emes, óńirge qaraı da ózgerip otyrady. Úıirmeniń keıbir túrinde oblystar arasyndaǵy aıyrmashylyq 35 myń teńgege jetti. Birneshe balasy bar otbasyna bul edáýir salmaq.
Buǵan deıin Qazaqstannyń qaı óńirinde balany mektepke daıyndaý arzanǵa túsetinin bildik.
