Qazaqstanda balalarǵa arnalǵan 50 oqý-saýyqtyrý jáne 100 iri oıyn-saýyq ortalyǵy salynbaq

ASTANA. QazAqparat - QR Premer-Mınıstriniń orynbasary Altaı Kólginovtiń tóraǵalyǵymen ótken keńeste oqýshylardy mektepten tys jumystarmen, onyń ishinde jazǵy demalys kezinde qamtýdy ulǵaıtý, sondaı-aq balalardyń shyǵarmashylyq jáne zııatkerlik damýyna arnalǵan iri ortalyqtar salý máseleleri talqylandy, dep Úkimettiń baspasóz qyzmeti.

Jas urpaqty tárbıeleý men olardyń jan-jaqty damýyna jaǵdaı jasap, bos ýaqytyn paıdaly jáne qyzyqty ótkizýge yqpaldasý mektepte beriletin bilimmen qatar mańyzdy sanalady.

Prezıdenttiń tapsyrmasyna sáıkes, respýblıkada oqýshylardyń shyǵarmashylyq jáne zııatkerlik damýyna, bilim alyp, jaqsy demalýyna, bos ýaqytyn paıdaly ótkizýine arnalǵan nysandar turǵyzý nemese eskilerin rekonstrýktsııalaý boıynsha jumystar jandanyp jatyr.

QR Oqý-aǵartý mınıstrliginiń málimetinshe, búginde elimizde balalarǵa arnalǵan 218 saýyqtyrý ortalyǵy jumys isteıdi, olardyń 120-sy – memlekettik, 98-i – jeke menshik.

2027 jylǵa deıin barlyq oblysta zamanaýı oqý-saýyqtyrý ortalyqtary ashylmaq. Olardyń ashylýy balalardy qamtý kórsetkishin aıtarlyqtaı ulǵaıtatyn bolady. Jazǵy ortalyqtardaǵy kórsetkish jyl saıyn 25%-ǵa ósedi dep kútilýde (2022 jyly atalǵan ortalyqtarda 178 myń bala demaldy). Al jyl boıy jumys jasaıtyn ortalyqtardaǵy qamtý kórsetkishi 2 ese ósedi (2022 jyly 77 myń bala qamtylmaq).

Qarajat jergilikti atqarýshy organdardyń bıýdjetinen jan basyna shaqqandaǵy qarjylandyrý júıesi arqyly bólinedi jáne bul salaǵa ınvestorlardy tartý da kózdelip otyr. Balalardyń shyǵarmashylyq jáne zııatkerlik damýyna arnalǵan 100 nysannyń (oqýshylar saraıy) qurylysy respýblıkalyq bıýdjet esebinen iske asyralady.

Balalar qosymsha bilimmen 100% qamtylatyn bolady. Bul kórsetkishke iri qosymsha bilim berý nysandaryn salý arqyly ǵana emes, osy maqsattarǵa memlekettik tapsyrysty kezeń-kezeńmen ulǵaıtý arqyly qol jetkizilmek. Sonymen qatar aýyl mektepterinde komıýnıtı-ortalyqtar ashý jáne eski mektepten tys uıymdardy jańǵyrtý josparlanyp otyr.

Ortalyq jáne jergilikti atqarýshy organdardyń qatysýymen ótken keńestiń qorytyndysy boıynsha osy maqsatta Jol kartasyn bekitip, jer ýchaskelerin bólý sharalaryn qabyldaý týraly tapsyrma berildi. Sondaı-aq qysqa merzimde balalar saýyqtyrý ortalyqtary men iri qosymsha bilim berý obektilerin salý, eski obektilerdi rekonstrýktsııalaý nemese qaıta formattaý úshin jobalaý-smetalyq qujattamany ázirleý mindetteldi.