Qazaqstanda balalarǵa áleýmettik jelige shekteý qoıý kerek pe – sarapshy pikiri
ASTANA. KAZINFORM – Qazaqstanda balalardyń áleýmettik jelini paıdalanýyna shekteý engizý máselesi qaıtadan qyzý talqylanyp jatyr. Sarapshylardyń aıtýynsha, tsıfrlyq orta damyǵan saıyn ǵalamtordaǵy qaýip te artyp keledi.
Bul týraly Jibek Joly radıosynyń efırinde saıasattanýshy, zań ǵylymdarynyń magıstri, memlekettik basqarý jáne qoǵamdyq qaýipsizdik salasynyń sarapshysy Dastan Dáýletııarov pikir bildirdi.
Onyń aıtýynsha, Qazaqstan tsıfrlandyrý salasy belsendi damyp keledi. Alaıda jańa tehnologııalarmen birge jańa máseleler de týyndap otyr. Ásirese, bul balalar men jasóspirimderge tikeleı áser etedi.
- Qazaqstan tsıfrlyq baǵytta damyp jatyr. Biraq ǵalamtorda bárine ruqsat berý durys emes. Tsıfrlyq keńistikti paıdalanýdyń belgili bir erejeleri bolýy kerek, - dedi sarapshy.
Onyń pikirinshe, qazir balalar ǵalamtor men áleýmettik jelini burynǵydan áldeqaıda erte qoldana bastaıdy. Sonyń saldarynan olar zııandy kontentke, tsıfrlyq táýeldilikke jáne algorıtmderdiń yqpalyna jıi ushyraıdy.
Sarapshy bul máseleni tek tyıym salý turǵysynan qarastyrý durys emes ekenin aıtty. Onyń sózinshe, basty maqsat – jas býyn úshin qaýipsiz tsıfrlyq orta qalyptastyrý.
- Balalardyń ǵalamtordaǵy qaýipsizdigi tek memlekettiń ǵana mindeti emes. Bul jerde ata-ana, mektep jáne áleýmettik platformalardyń da jaýapkershiligi bar, - dedi ol.
Sondaı-aq, maman oıyn-saýyq pen bilim berý kontentin ajyratyp, tsıfrlyq saýattylyqty jetildirý mańyzdy ekenin atap ótti. Onyń aıtýynsha, qazirgi algorıtmder qoldanýshylardyń kúndelikti ádetin qalyptastyryp, psıhologııasyna áser ete alady.
Dastan Dáýletııarov sóz bostandyǵy men balalar qaýipsizdigi arasyndaǵy tepe-teńdikke qatysty kózqarasyn da bólisti.
– Barlyq shekteý zań aıasynda ári qoǵam múddesin eskere otyryp engizilýi tıis, – dedi ol.
Eske salaıyq, Qazaqstanda 16 jasqa tolmaǵan balalardyń áleýmettik jelige tirkelýine shekteý qoıý bastamasy kóterilgen bolatyn. Qazir bul másele talqylaý kezeńinde.
Bir tarap muny jasóspirimderdiń psıhıkalyq densaýlyǵy men aqparattyq qaýipsizdigin qorǵaýdyń joly dep sanasa, endi biri mundaı shekteýdi is júzinde baqylaý qıyn ekenin aıtady.
Aıta keteıik, buǵan deıin balalarǵa áleýmettik jelilerge tyıym salatyn normalar Quryltaıda qaralatynyn jazǵanbyz.
Kamıla Taıtóleý
