Qazaqstanda balalarǵa 13 myńǵa tarta jazǵy lager qyzmet etetin bolady - BǴM
ASTANA. QazAqparat - Bıyl Qazaqstanda balalarǵa 13 myńǵa tarta jazǵy lager qyzmet etetin bolady, dep habarlaıdy QazAqparat.
Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Bilim jáne ǵylym vıtse-mınıstri Bıbigúl Asylova málim etti.
«Balalardyń uıymdastyrylǵan demalysyn qamtamasyz etý úshin, jergilikti atqarýshy organdardyń málimetteri boıynsha, jazǵy kezeńde elimizde 13 myńnan astam lager jumys isteıtin bolady. Olardyń ishinde 11,5 myńy - jyl boıy isteıtin lager bolsa, 200-den astamy - qala mańy lagerleri, 2000-ǵa jýyǵy shatyrly jáne kıiz úıli lagerler. 1 maýsymnan bastap, mektep janynan qurylǵan lagerler esigin ashady. Jetim, ata-anasynyń qamqorlyǵynsyz qalǵan jetkinshekter, múmkindigi shekteýli balalar, sonymen qatar az qamtylǵan otbasylardyń balalary lagerlerde jergilikti bıýdjettiń esebinen tegin demalatyn bolady. Bunymen qosa, sabaqta erekshe jetistikke jetken oqýshylar da tegin demala alady. Jazǵy mezgilde balalardyń demalysyn uıymdastyrý memleket pen ata-ananyń mańyzdy mindetteriniń biri. Barlyq balalar eldegi lagerlerde aqyly demalýǵa múmkindigi bar», - dep atap ótti vıtse-mınıstr.
Onyń sózinshe, jazǵy demalysty, saýyqtyrý sharalaryn jáne bos ýaqyttaryn tıimdi uıymdastyrý maqsatynda mınıstrlik normatıvtik qujattardy jasaqtap, jetildirýde. Sondaı-aq jyl saıyn pedagogtarǵa arnalǵan kýrstar ótkiziledi.
«Sonymen qatar balalardy quqyqtyq tárbıeleý de úlken mańyzǵa ıe. Barlyǵymyzdyń aldymyzda turǵan basty mindet - jazǵy mezgilde balalardyń qaýipsizdigin qamtamasyz etý. Jazǵy maýsymǵa daıyndalý barysynda barlyq oblystarda lagerlerdi qabyldaıtyn jergilikti ákim orynbasarlarynyń tóraǵalyǵymen vedomstvoaralyq komıssııa jumys istedi. Onyń quramyna sanepıdemııalyq, órtke qarsy qyzmet organdarynyń aımaqtyq bólimsheleriniń qyzmetkerleri kirdi. Balalarǵa arnalǵan saýyqtyrý ortalyqtary men lagerlerdiń ınfraqurylymyn jetildirý jumystary atqarylýda», - dep atap ótti B. Asylova.
