Qazaqstanda balalardyń meshit pen shirkeýlerge barýyna tyıym salynady

ASTANA. QazAqparat - Zańnamada qarastyrylyp otyrǵan túzetýler aıasynda balalar dinı ǵuryptarǵa, meshit pen shirkeýge tek eresektermen erip bara alady. Al jeke ózderi barýǵa tyıym salynbaq. Bul týraly búgin QR Din isteri jáne azamattyq qoǵam vıtse-mınıstri Berik Aryn málim etti, dep habarlaıdy QazAqparat.

Ortalyq kommýnıkatsııalar qyzmetindegi baspasóz máslıhatynda vedomstvo ókiline «balalar ózderi jalǵyz meshit pen shirkeýge bara ala ma?» degen saýal qoıyldy.

«Bul normada mindetti túrde eresek adamdardyń biri balanyń janynda bolýy eskerilgen. Naqtyraq aıtqanda, ata-ananyń biri, kámeletke tolǵan jaqyn týystary, ıaǵnı aǵalary men ápkeleri, atasy men ájesi, sondaı-aq zańdy ókilderi bolýy kerek. Osy oraıda mindetti talaptyń biri - ol ata-ananyń biri qarsy bolmaýy tıis», - dep túsindirdi ol tilshiler saýalyna jaýap berý kezinde.

B. Arynnyń sózinshe, bul norma balalardy dinı sıpattaǵy destrýktıvti yqpaldan qorǵaýǵa arnalǵan.

Sonymen qatar, osy norma dinı birlestikter jetekshileri úshin jaýapkershilikti júktep otyr.

«Atalǵan talaptarsyz kámeletke tolmaǵandardyń ǵuryptarǵa qatysýyna jol bermeý boıynsha olar tıisti sharalardy qabyldaýǵa mindetti bolady», - dedi vıtse-mınıstr.

Osy oraıda dinı birlestik zańnan úzindini ilip qoıý kerek nemese ýaǵyz aıtý kezinde qajetti aqparatty berýi qajet.