Qazaqstanda balalardyń qaýipsizdigi týraly ınternet portal qurylmaq
«Internetti paıdalaný mádenıetin arttyrý, ınternet-qyzmetterdi paıdalanýshylardyń jaýapkershiligin tárbıeleý maqsatynda bilim berý uıymdarynyń oqýshylary men tárbıelenýshileri úshin (3 mln. jýyq oqýshy, ata-analar) «Men OFFLINE», «Qaýipsiz ınternet» keń aýqymdy aqparattyq naýqandar ótkiziledi. 2019 jyldan bastap ınternet jelisinde terrorıstik jáne dinı-ekstremıstik sıpattaǵy materıaldardy anyqtaý, esepke alý, baǵalaý jáne olarǵa qol jetkizýdi shekteý jónindegi jumysqa tartylǵan memlekettik organdardyń ózara is-qımylyn ońtaılandyrýǵa jáne avtomattandyrýǵa baǵyttalǵan «Kıbernadzor» aqparattyq júıesi jumys isteıdi», - dedi Úkimet basshysy.
Onyń dereginshe, osy jyldyń basynan beri ınternet keńistikte bala quqyqtaryn buzýmen baılanysty 1 756 buzýshylyq, sýıtsıdti, qatygezdikke tabynýdy jáne zorlyq-zombylyqty nasıhattaıtyn 553 materıal anyqtaldy. Olardy ınternet resýrstardyń menshik ıeleri men ákimshilikteri alyp tastady.
«Qazirgi ýaqytta ýákiletti organdar uıǵarymdar negizinde zańda tyıym salynǵan aqparat qamtylǵan ınternet resýrstarǵa qol jetkizýdi shekteý boıynsha sharalar qabyldaýda. Balalar men ata-analar úshin Facebook, Instagram áleýmettik jelilerinde jarııalanǵan «Balalardy ınternet jelisindegi zııandy aqparattan qorǵaý týraly», «Balalardy ınternettegi zııandy aqparattan qorǵaý jónindegi ata-analarǵa arnalǵan aqparattyq kýrs» usynymdary ázirlendi, sondaı-aq Telegram messendjerinde jedel habarlamalar rejıminde táýlik boıy «BALA QORGAU» chaty uıymdastyrylǵan. Sonymen qatar, balalar men ata-analardyń tsıfrlyq saýattylyǵyn arttyrý úshin «Balalardyń qaýipsizdigi týraly» ınternet portalyn qurý josparlanyp otyr», - dedi Asqar Mamın.
