Qazaqstanda balalardyń 8 paıyzynan astamy sýıtsıdke barǵan - A. Smaıyl
ASTANA. 18 jeltoqsan. QazAqparat - Qazaqstanda balalardyń 8 paıyzynan astamy sýıtsıdke barǵan. Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine balalardy densaýlyǵy men damýyna zardabyn tıgizetin aqparattan qorǵaý máseleleri boıynsha ózgerister men tolyqtyrýlar engizý týraly» zań jobasy barysynda depýtat Aldan Smaıyl osylaı málim etti.
Depýtattyń aıtýynsha, zań jobasymen eń birinshi kezekte qatygezdik pen zorlyq-zombylyqty nasıhattaıtyn aqparattarǵa tyıym salynady. «Sońǵy ýaqytta balalar arasynda qatygezdik artyp, bir-birine baýyrmaldyq degen sónip barady. Bunyń sebebi zalaldy aqparattardyń emin-erkin taralýynan týyndasa kerek. Budan keıingi kezekte balalardyń óz ómirlerine ózderi zııan tıgizetin, ózine ózi qol salýǵa ıtermeleıtin aqparattarǵa tyıym salǵaly otyrmyz. Óıtkeni, sýıtsıd degen aramyzda kóbeıip ketti. Dúnıejúzilik derekterge qaraǵanda BUU málimetinshe jylyna 1,5 mln. jýyq bala ózine ózi qol salady. Al Qazaqstanda ótken jyldarda kámeletke tolmaǵan jalpy balalar sanynyń 8 paıyzdan astamy osyndaı áreketterge barǵan. Árıne, olardyń bári ólimmen aıaqtalǵan joq. Degenmen bul kórsetkish qaýipti», - deıdi depýtat.
Budan bólek, depýtat dástúrli emes seksýaldyq baǵdardy qamtıtyn aqparattarǵa da tyıym salynatynyn jetkizdi. «Óıtkeni, bul másele qoǵamda qyzý talqylanyp jatyr. Taıaýda ǵana Aqtóbedegi bir saıt ashyqtan ashyq balalardy osyǵan shaqyrǵan. Biz dereý prokýratýraǵa hat joldadyq, búgin ǵana soǵan qatysty jaýap alyp otyrmyn. Olar saıttyń máselesin qarap jatyr eken. Alaıda, osyndaı zań bolmaǵandyqtan ondaı saıttardy birjolata jaýyp tastaý da múmkin bolmaı otyrǵan sekildi. Sol úshin biz bundaı aqparattardy tyıym salynatyn aqparattar qataryna qosyp otyrmyz», - deıdi depýtat.
