Qazaqstanda balalardyń 40 paıyzǵa jýyǵy jekemenshik balabaqshada tárbıelenýde
NUR-SULTAN. QazAqparat - Qazaqstandaǵy balalardyń 40 paıyzǵa jýyǵy jekemenshik balabaqshada tárbıelenýde. Bul týraly memlekettik-jekeshelik áriptestik taqyrybyna arnalǵan Úkimet otyrysynda QR Bilim jáne ǵylym mınıstri Kúlásh Shámshıdınova málim etti, dep habarlaıdy QazAqparat tilshisi.
«Memlekettik-jekeshelik áriptestik jobalary negizinen mektepke deıingi salada iske asyrylýda. Jalpy, jekemenshik mektepke deıingi uıymdardyń sany bes jyldyń ishinde 3,5 esege artyp, 3 640-qa jetti. Bul balalardy mektepke deıingi tárbıemen jáne oqytýmen qamtýdyń qarqyndy ósýine yqpal etti. Osy oraıda 3 jastan 6 jasqa deıingi balany qamtý 95 paıyzdan asty», - dedi mınıstr.
Onyń sózine qaraǵanda, mektepke deıingi uıymdardaǵy oryndardyń 39,4 paıyzy jekememenshik balabaqshada beriledi. Bul turǵyda 307 myńnan astam balany qamtýǵa múmkin boldy. Osylaısha, jeke sektordy tarta otyryp, memleket shamamen 615 mlrd teńgeni únemdedi. Sebebi 307 myń balany qamtý úshin jańa 1 025 balabaqsha salýdy talap eter edi.
Budan buryn habarlanǵandaı, búgin Úkimet otyrysynda QR Premer-Mınıstri Asqar Mamın memlekettik-jekeshelik áriptestik salasyna qatysty tapsyrmalar berdi.
