Qazaqstanda balalardyń 17 paıyzǵa jýyǵy ǵana balabaqshaǵa bardy – BǴM
NUR-SULTAN. QazAqparat - Búgin elimiz boıynsha barlyq búldirshinderdiń tek 16,8% balabaqshalarǵa barǵan. Bul týraly QR BǴM Mektepke deıingi jáne orta bilim berý komıtetiniń basshysy Maıra Meldebekova málim etti, dep habarlaıdy QazAqparat.
Búgin Qazaqstanda 149 300 búldirshin balabaqshalarǵa bardy. Qazirgi ýaqytta memlekettik mektepke deıingi mekemeler tek óńirlerde shtattyq rejimde jumys isteıdi.
«Tótenshe jaǵdaı engizilgenge deıin mektepke deıingi uıymdarǵa 888,3 myń bala kelgen. Eger TJ-nyń birinshi kúni (16 naýryz) mektepke deıingi uıymdarǵa kelýshiler kórsetkishi 42% (392 myń adam) bolsa, 19 naýryzda tek 28 paıyzdy qurady», - dedi Maıra Meldebekova.
Eske sala ketsek, Nur-Sultan men Almatyda karantın jarııalanýyna baılanysty memlekettik jáne jekemenshik mektepke deıingi uıymdar jabylǵan. Sondaı-aq, Túrkistan oblysynda halyqtyń tyǵyzdyǵyna jáne ınfektsııanyń taralý qaýpiniń joǵary bolýyna baılanysty barlyq balabaqsha jumysyn toqtatty.
Buǵan deıin QR Bilim jáne ǵylym mınıstrligi ata-analarǵa balalardy múmkindiginshe mektepke deıingi uıymdarǵa aparmaýdy usynǵan edi.
